أعمال 1 - Qatifi New Arabic Version / الترجمة العربية القطيفية الجديدة

صعود المسيح إلى السما

¹ رويت لك في كتابي الأول، يا ثاوفيلس، كل أعمال يسوع وتعالميه من بداية رسالته

² إلين اليوم إلا أرتفع فيه إلى السما، بعد ما قدم وصاياه بالروح القدس إلى الرسل إلا أختارهم.

³ و في فترة الأربعين يوم بعد آلامه، ظهر ليهم كم مره، وأثبت ليهم أن هو حي ببراهين واجد وأكيده، وكلمهم عن ملكوت الله.

⁴ و لما أجتمع وياهم، قال: "لا تمشوا من أورشليم، لكن أبقوا فيها منتظرين إلين ما يتم وعد الآب، إلا سبق وكلمتكم عنه.

⁵ لأن يوحنا عمد الناس بالماي، أما أنتون تتعمدوا بعد أيام قليلة بالروح القدس!"

⁶ وسألوه المجتمعين: "يا رب، في هالوقت بترجِّع الملك إلى إسرائيل؟"

⁷ وجاوبهم: "ما تقدروا تعرفوا المواعيد والأوقات إلا حددها الآب بسلطته.

⁸ و لكن في الوقت إلا يحل الروح القدس عليكم بتنعطوا قوة، وبتكونوا ليي شهود في أورشليم واليهودية كلها والسامرة و إلى أبعد الأماكن في الأرض."

⁹ بعد ما قال هالكلام أرتفع إلى السما و هم قاعدين يطالعوا فيه. و بعدين حجبته غيمة عن أنظارهم.

¹⁰ و لما كانوا يطالعوا في السما و هو يصعد ليها، طلع ليهم رجالين أثنين لابسين ثياب بيضه،

¹¹ و قالوا ليهم: "يا الجليليين، إلاويه واقفين تطالعوا في السما؟ يسوع هدا إلا أرتفع عنكم إلى السما بيرجع منها بالضبط زي ما شتفتوه رايح!"

أختيار متياس بدل عن يهودا

¹² بعدين رجعوا الرسل أورشليم من الجبل المعروف بجبل الزيتون، و هو قريب من أورشليم المسافة إلا يجوز له يمشيها في يوم السبت.

¹³ و لما وصلوا إلى الغرفة إلا في الطابق الفوقي إلا كانوا يسكنوا فيها، و هم: بطرس ويوحنا ويعقوب وأندراوس وفيلبس وتوما وبرثلماوس ومتَّى ويعقوب بن حلفى وسمعان المتعصب (إلا يدعم أستقلال اليهود من سلطة الرومان) ويهودا أخو يعقوب.

¹⁴ وكانوا كلهم يداوموا على الصلاة بقلب واحد و وياهم بعض النسوان، ومريم أم يسوع وأخوته.

¹⁵ و أجتمع في يوم من الأيام تقريبًا مية وعشرين واحد من الأخوه، ووقف بطرس بينهم وخطب فيهم و قال:

¹⁶ "أخوتي، كان لازم تتحقق النبوة إلا قال عنها الروح القدس على لسان النبي داوُد، عن يهودا إلا تغير علينا و دلى دولين إلا أعتقلوا يسوع.

¹⁷ و كان يهودا محسوب واحد منا، وشاركنا في خدمتنا.

¹⁸ بعدين قام شرى بالفلوس إلا حصل عليها بدل خيانته بستان، وفيه طاح على وجهه، وأنشق من وسطه وطلعت مصارينه.

¹⁹ ودروا كل أهل أورشليم بهالقصة، فسموا بستانه "حقل دَمَخْ"، يعني بلغتهم "حقل الدم."

²⁰ فتمت النبوءة إلا جا ذكرها في كتاب المزامير: خل يصير داره خراب، ولا يسكنها ساكن. و بعد: وخل شغله ياخده واحد ثاني!

²¹ عجل لازم الحين نختار واحد من الرجال إلا رافقونا طول المدة إلا قضاها ويانا الرب يسوع،

²² من يوم عمده يوحنا إلى يوم أرتفاعه عنا إلى السما، عشان يكون شاهد بقيامة يسوع."

²³ ورشح الحاضرين رجال أثنين و هم: يوسف ويسموه بارسابا ولقبه بيستس، ومتياس

²⁴ بعدين صلوا و قالوا: "يا ربنا يا من تعرف قلوب الناس كلهم، أكشف لينا أي واحد من ديلين الرجالين الإثنين تختار

²⁵ عشان يشاركنا في الخدمة والرسالة بدال يهودا إلا راح إلى المكان إلا يستاهله."

²⁶ بعدين سووا قرعة، وراحت لمتياس، فضموه إلى الرسل الحدعشر.