Zacarías 9 - Qheshwa Biblia DC

Jerusalén qayllapi llajtas jasut'isqas

¹ Kay kutipi Señor parlarqa Hadrac jallp'aj, jinataj Damasco llajtaj contrampi, kay jinata: Siriapi llajtakunaqa Señorpatamin, imaynatachus Israelmanta ayllukunapis kanku, ajinata.

² Chay qayllallapitaj kashan chay Hamat llajtapis Señorpata. Chantá Tiropis, Sidompis tukuy kapuyninwan Señorpallatataj.

³ Tiromanta runas jataricherqanku jatuchej pakakuna wasista, chaymantaj qorita, qolqeta t'uru qolluta jina qolluykorqanku.

⁴ Señortaj chay tukuyta qhechonqa mar qochamantaj chay tukuy qhapaj kayninkuta wijch'uykonqa, llajtataj mana puchuyojta q'olarpayachenqa.

⁵ Ascalón llajta kayta rikuspaqa mayta mancharikonqa. Gazapis ñak'arillanqataj sinch'ita, Ecrompa suyaynimpis pampaman laq'akonqa. Gazaqa mana reyniyoj qhepakonqa. Ascalompi tiyakojkunapis manaña puchonqachu.

⁶ Asdodpeqa tukuy laya ayllumanta runas tiyakonqanku, filisteospa runaykachasqankutataj k'umuykuchisaj.

⁷ Yawarniyoj aychata mikhunankuta simisninkumanta qhechusaj, mana mikhunapaj kaj mikhunaykichejtataj kirusniykichejmantaña orqhosaj. Chaywampis, chaykunamantaqa wakin noqapaj qhepakonqankuraj. Paykunaqa Judá aylluwan ujlla kanqanku, Ecrontaj jebuseos jina kanqanku.

⁸ Noqataj paykunata jark'asaj pischus kayman jamojkunajpa makinmantapis, tukuy noqajta kajkunataqa. Ñac'arichisojkunaqa manaña ñak'arichisonqachejchu, imaraykuchus kunanqa noqa kikiy ñawisniywan qhawamusqaykichej.

Israelpa jamoj reynin

⁹ Siompi kaj llajta sinch'ita kusikuy! Jerusalén llajta, takiy kusiywan Reyniyki may justotaj atiyniyojtaj jamusunki, uj llamp'u sonqo jina burropi lloq'asqa. Chay burritoqa, china burroj uñan.

¹⁰ Paymin Efraimpa carrosninta phirenqa, Jerusalempa caballosninta chantá maqanakupi k'uru k'aspisninkutapis. Paymin tukuy llajtakunaman kusiy kausaymanta willaranqa, kamachenqataj uj mar qochamanta uj mar qochakama, Eufrates mayumanta kay pachaj waj k'uchunkama.

Watejmanta Israel oqharikonqa

¹¹ Kayta nin Señor: Jerusalén, yawarniykipi tratoykirayku, ch'aki pujyumanta wijch'usqa, chay presosniykita noqa orqhosaj.

¹² Qankunapis, waj llajtamanta wijch'usqas, suyayniyojraj kajkuna chay pakakuna sumaj wasisniykichejman kutipuychej! Niykichejña bendicionesniyta qonasuykichejta may chhika ñak'arisqaykichejmanta uj jinatawanraj.

¹³ Ña maqanakupaj uj k'uruta ruwaniña chaytaj Judapaj kanqa. K'urumantaj uj flechata churaniña chaytaj Efraimpaj kanqa. Qanmantataj Sión espadata ruwasaj. Wawasniykita oqharichisaj Greciaj wawasnimpa contrampi.

¹⁴ Señor ayllunman rikuchikonqa, flechasnintataj kacharenqa lliuj q'ajkunasta jina. Señor Dios putututa waqachispa, muyoj wayras chaupipi sur lado ñaupajman rirenqa.

¹⁵ Tukuy Atiyniyoj Señor waqaychanqa tukuy paypata kajkunata, wawasninrí warak'ajkunaspa rumisninkuta saruraspa phiriranqanku chay enemigosninkutataj oqoykonqanku.

¹⁶ Jaqay p'unchaypeqa Señor Dios ayllunta salvanqa ovejasninta jina, paykunataj manchay k'anchaj precioyoj pillupi rumis jina lliphirenqanku kikin jallp'ankupi.

¹⁷ May walej, may k'achitupunitaj kanqa chay jallp'ankoqa! May chhika trigo poqojtin, vinopis ch'irwakojtenqa; wayna wawasninchej sipaskunasninchejpis k'achitus wiñarenqanku.