Zacarías 7 - Qheshwa Biblia DC

Mana cheqa sonqowanchu ayunota ruwanku

¹ Rey Darío tawa watastaña kamachishajtin, isq'on kaj killampi, Quisleu nisqa chaypi tawa kaj p'unchaynimpi, profeta Zacariasman Señor parlaykorqa.

^2-3 Jaqay tiempopi Betel llajta kachasqa Sarezerta Regem-melecta runasnintawan ima Señorpa yanapayninta mañakoj, chantá, Tukuy Atiyniyoj Señor yupaychana wasimpi kaj profetasta jinataj sacerdotesta tapoj renqanku, nispa: Llakiy p'achawan p'achallikullasqaykuchu, ayunotapis ruwallasqaykupunichu, sapa wata phishqa kaj killapi, imaynatachus kunankama ruwasharqayku jinallatapunichu?, nispa.

^4-6 Chaymanta Tukuy Atiyniyoj Señor noqaman parlamuwaspa nerqa: Kayta niy tukuy aylluyman jinataj sacerdotesmampis: Qankuna llakiy p'achawan p'achallikunkichej ayunotataj ruwankichej phishqa kaj killapi, qhanchis kaj killapipis qhanchis chunka watas qhepamantaña. Chaytaqa mana noqata yupaychanawankupajchu ruwanku, mana chayqa mikhunku ujyanku sajsasqas kanallankupaj.

⁷ Manachu kaykunataqa Señor parlarqa ñaupa profetasnejta chayllatataj, maypachachus Jerusalén runa junt'ayoj, nitaj ni ima ch'ajwapis kashajtin, jinallataj qayllampi kaj llajtaspis, aylluspis Neguev jinataj Sefalapis?

Mana kasukoj kasqankurayku jallp'ankumanta wijch'usqas kanqanku

^8-9 Señorqa profeta Zacariasman parlarqa, nispa: Kaytamin noqa kamachini: Cheqan yuyaypi purejkuna kaychej, khuyakojkuna allin k'achastaj kaychej ujkuna ujkunapaj.

¹⁰ Ama ñak'arichiychejchu warmi sapasta nitaj wajcha wawasta, nitaj waj llajtayojkunata, nillataj wajchastapis. Ama yuyallaychejpischu ujkuna ujkunata ima sajratapis ruwanakuytaqa.

¹¹ Runastaj mana kasuta ruwarqankuchu. Tukuyninku wasanchakorqanku mana uyarejtaj tukorqanku.

^12-13 Sonqosninkuta diamante rumita jina rumiyacherqanku, Tukuy Atiyniyoj Señorpa kamachiyninta yachachiykunasnintapis mana kasorqankuchu, mayqentachus ñaupa profetasninman Espiritunejta willarqa chayta. Chayraykumin Señorqa manchaytapuni phiñakorqa, nerqataj: Imaynatachus wajyashajtiy paykuna mana uyariyta munawarqankuchu, ajinallatataj noqapis wajyashawajtinku mana uyarisajchu.

¹⁴ Chayrayku uj muyoj wayrawan jina tukuyninkuta ch'eqeracherqani mana rejsisqa llajtasman, chay qhepatataj chay llajtaqa ni pejpa tiyanan uj ch'in pampaman tukorqa. Chay jina k'acha llajtata llakiyta ch'inyarparicherqanku.