Zacarías 6 - Qheshwa Biblia DC

Profetaqa tawa guerraman rina carrosta rikorqa

¹ Rikullarqanitaj mosqoypi jina, guerrapaj tawa carrosta broncemanta ruwasqas iskay orqos chaupipi.

^2-3 Ñaupaj kaj carrotaqa puka caballos aysasharqanku; iskay kaj carrotataj yana caballos, kinsa kajtataj yuraj caballos tawa kajtataj bayo caballos.

⁴ Parlashawarqa chay angelta taporqani: Señorníy, imatataj kay niyta munanri?, nispa.

⁵ Angeltaj kutichiwarqa: Chaykunaqa tawa wayras kanku, Señorpa ñaupaqenmanta tukuy jallp'aman llojsejkuna.

⁶ Yana caballoswan aysasqa carroqa rishan norte ladoman, yuraj caballoswan aysasqa carrotaj rishan inti yaykuy ladoman, puka caballos aysasqan carrotaj risharqa sur ladoman, nispa.

⁷ Chay puka caballostaj llojsimorqanku tukuy jallp'antinta muyumoj rinankupaj jina. Jinallamanta ángel nerqa: Purimuychej tukuy jallp'anejta, nispa. Paykunataj nisqanman jina rerqanku.

⁸ Kay qhepatataj ángel qhaparimuwarqa: Norte ladoman rerqanku chaykunaqa, Señorpa phiñakuyninta thasnuchenqanku chay lado jallp'aspaj, nispa.

Josuéj pilluchakusqan

^9-10 Señor kayta parlawarqa: Babiloniapi wijch'usqas kasharqanku, chaymanta kutimunkuña chaykunamanta oqhariy qolqeta, Heldaimanta, Tobiasmanta, Jedaiasmanta ima. Sofoniaspa wawan Josiaspa wasinman riy.

¹¹ Oqhariytaj colectata: Qolqemanta, qorimanta. Chay qolqeta, qorita oqharisqaykiwantaj pilluta ruwaytawan Josadacpa wawan jatun sacerdote Josuéj umanman churaykuy.

¹² Niytaj: Tukuy Atiyniyoj Señor nillantaj, chay wiñashan nisqa qhareqa kikin saphisninmanta p'utumunanta, Señorpa yupaychana wasintataj jatarichinanta.

¹³ Yupaychana wasiyta jatarichejtinñataj, payman tukuy yupaychaykunasta uj reyman jina qonqanku. Uj tronoman tiyaykukonqa kamachinampaj, chay uj ladonmantaj uj sacerdote tiyaykukonqa, iskayninkutaj sonqo tiyasqallapi kanqanku.

¹⁴ Chay pillustaj yupaychana wasipi qhepakonqanku sapa kuti yuyarikunankupaj, Heldaimanta, Tobiasmanta, Jedaiasmanta, chantá Sofoniaspa wawan Josiasmantataj.

¹⁵ Karumanta runas jamonqanku, Señorpa yupaychana wasinta ruwaypi yanapanankupaj; jinamanta yachankichej qankunaman Tukuy Atiyniyoj Señor kachamuwasqanta. Kay tukuy imas kanqanku maypachachus qankuna Señorpa nisqanta uyarinkichej, kasunkichejtaj chaypacha.