Zacarías 5 - Qheshwa Biblia DC

Uj qelqasqa rollota phawaykachashajta rikorqa

¹ Wajta rikullarqanitaj mosqoypi jina, uj qelqasqa rollota phawaykachashajta.

² Angeltaj tapuwarqa: Imatataj rikushanki?, nispa. Chaypitaj kuticherqani: Rikushani uj qelqasqa rollota phawaykachashajta. Chaytaj chhoqonman isq'on metrosniyoj kasqa, anchonmantaj tawa metro khuskanniyoj kasqa, nispa.

³ Paytaj niwarqa: Chaypi tukuy jallp'aj maldicionninmanta qelqasqa kashan. Puraj ladopi escribisqa kasqanman jinaqa, pipis suwajqa chayri pipis qhasimanta jurajqa, mana jasut'isqapunichu kanqa.

⁴ Tukuy Atiyniyoj Señor nin: Noqa kachamuni kay maldiciontaqa, pischus suwanku, pistajchus qhasimanta sutiypi juranku chaykunaj wasinman yaykunampaj. Chay maldiciontaj chaypi qhepakonqa, k'aspis jinataj rumis ni uj puchuyoj kanankama, nispa.

Profetaqa chay medina uqhupitaj uj warmita tiyashajta rikorqa

⁵ Chantá, noqawan parlasharqa chay ángel niwarqa: Qhawariy imachus chaypi rikhurin chayta nispa.

⁶ Noqataj tapurerqani: Imataj chayri?, nispa. Paytaj kutichiwarqa: Chayqa medinapaj, tukuy kay jallp'api tiyakojkunaj juchasninta medinapaj, nispa.

⁷ Chay medinaqa, titiwan kirpasqa kashan. Chay kirpananta kicharejtinkutaj, chay ukhupi uj warmi tiyashaj rikhurerqa.

⁸ Angeltaj niwarqa: Chay warmeqa sajra kay, nispa. Chay medina ukhuman tanqaykuspataj titi kirpananwan wisq'aykorqa.

⁹ Ujtawan qhawarejtiytaj iskay warmis rikhurimorqanku lijrasniyoj. Wayrallataj paykunata apaykachasharqa. Lijrasninkoqa cigüeñaj lijrasnin jinas karqanku, chay medinatarí phawachispa apaykachasharqanku.

¹⁰ Tapullarqanitaj, noqawan parlasharqa chay angelta: Maymantaj apashanku chay medinata?, nispa.

¹¹ Payta kutichiwarqa: Babiloniapi uj templota jatarichenqanku. Tukusqaña kajtintaj, chukusta jatarichenqanku chay pataman churanankupaj, nispa.