Zacarías 2 - Qheshwa Biblia DC

Profetaqa q'aytuta medinapaj rikorqa

¹ Ujtawampis rikullarqanitaj mosqoypi jina. Uj runa medina q'aytuta jap'irisqa rikhuriwarqa.

² Tapurerqanitaj: Maymantaj rishanki?, nispa. Paytaj kutichiwarqa: Jerusalén llajtata midej rishani, nispa.

^3-4 Chaymanta noqawan parlasharqa chay angelqa riporqa, waj angeltaj payta taripaj jamorqa, nerqataj ajinata: Usqhay usqhayta riy. Chay medina q'aytuta jap'isharqa chay runaman willamuy, nispa: Watejmanta Jerusalempi tiyakullanqankutaj may chhika uywasniyoj kasqampi kancha perqasninkupis mana kanqachu.

⁵ Chaywampis, noqa kikiy sayaykusaj Jerusalempa muyuynimpi nina perqa jina, kikin llajta chaupipitaj k'anchaj gloriayta rikuchisaj. Noqa Señorniykichej kayta nini.

Señor salvanqa Israel ayllunta

^6-7 Noqa Señorniykichej nillaykichejtaj: Noqamin qankunata tukuynejman ch'eqeracherqaykichej. Kunantaj niykichej: Usqhayta ayqekuychej jaqay uray llajtamanta. Sión orqopi tiyakorqankichej, kunantaj maypichus wijch'usqas kashankichej chay Babiloniamanta ayqellaychejtaj. Noqa Señormin kayta nini.

^8-9 Tukuy Atiyniyoj Señor kayta willanaypaj kachamuwan tukuy imasniykichejta ch'uskirasorqachej chaykunaj contrampi, nispa: Pillapis aylluyta llankhaykojqa, ñawiytapis jallk'aytapis llankhaykojpa jinamin. Chayrayku noqa kikiy maqanakusaj chay llajtayojkunawanqa, kikin kamachisnillantaj paykunatapis ch'uskirananta nisaj. Ajinamanta Tukuy Atiyniyoj Señorqa rikuchenqa k'anchaj glorianta, chantá yachankichej kikin Señor qankunaman kachamuwasqanta.

¹⁰ Jerusalempi tiyakojkuna kusiywan takiychej imaraykuchus qankuna ukhupi tiyakoj jamuni. Ajina nin Señorniykichej.

¹¹ Kayta rikuspa ashkha runakuna Señorman chimpamonqanku. Paytaj nenqa: Kay runakuna ayllullaytaj kanqanku, nispa. Jinamanta kausakusaj qankunawan khuska. Ajinamanta yachanaykichejpaj Tukuy Atiyniyoj Señor qankunaman kachamuwasqanta.

¹² Señor watejmanta Judata jap'ikapullanqataj sumaj chayaqempaj jina Diospa jallp'ampi. Jerusalentataj watejmanta ajllasqa llajtampaj jina oqharenqa.

¹³ Tukuy kay pachapi kajkuna ch'inyarichunku Señorpa ñaupaqempi, imaraykuchus Payqa jamun noqanchejman santo cheqamanta, maypichus tiyakun chaymanta.