Zacarías 14 - Qheshwa Biblia DC

Jerusalén jatun atipaywan atipanqa

¹ Jamushanña Señorpa p'unchaynenqa maypachachus Jerusalempi qankuna ukhupi puchojkunapis rak'irasqas kanqanku chaypacha.

² Chay p'unchaypi Señor tantaykamonqa tukuy nacionesta Jerusalenwan maqanakunankupaj, wasisninkumanta orqhoraspa llajtantinta jap'ikaponqanku, warmisninkutapis mana munashajta qhenchachanqanku, chaypi tiyakojkunamanta khuskantapuni orqhospa waj llajtasman aparanqanku presosta jina. Chay puchojkunalla chaypi qhepakonqanku.

³ Jinapis chay qhepantaqa Señor llojsimonqa chay nacionespa contrampi, imaynatachus chay ñaupa maqanaku p'unchaykunapi ruwarqa ajinata.

⁴ Chay p'unchaypitaj Señorqa, Jerusalén chimpapi kashan chay Olivos orqoman chakisninta churakurenqa, chay inti llojsimuynejman jina. Uj jatun valleta aysarikonqa inti llojsimuy ladomanta inti yaykuy ladoman jina, chaytaj Olivos orqotaqa iskayman t'aqanqa. Khuskan orqoqa patanejman apasqa kanqa, khuskannintaj uranejman.

⁵ Qankunarí ayqenkichej, chay orqos chaupipi kanqa chay vallenejta chayaspa chay uj ladopi kashan chay Azalkama. Ayqenkichej qankunapis ñaupa tatasniykichej, maypachachus rey Uzías Judapi kamachishajtin jallp'a ikhakuy kajtin, ayqerqanku ajinata. Chaypachamin jamonqa Señor Diosneyqa tukuy payta qhatejkunawan khuska.

⁶ Chay p'unchaypeqa mana kanqachu chiri nitaj chhullunkaspis.

⁷ Diospa uj k'ata p'unchaynin kanqa. Paypa rejsisqallan chay p'unchay kanqa. Manaña rejsikonqachu p'unchay nitaj tutapis. Ch'isimpis k'anchayllapuni kanqa.

⁸ Chaypacha Jerusalenmanta ch'uwa jutoj yaku correrenqa, q'oñi tiempopipis chiri tiempopipis mana ch'akenqachu. Khuskannenqa wañusqa qocha nisqaman renqa, khuskannintaj Mediterráneo nisqaman renqa.

⁹ Chay p'unchaypeqa Señorlla kamachenqa tukuynin jallp'api. Chaypacha uj k'ata Señorlla kanqa, uj k'atallataj sutimpis kanqa.

¹⁰ Tukuy jallp'aqa pampachasqa kanqa Jerusalenmanta surnejpi chay Gabamanta Rimonkama. Jerusalén llajtaqa wichaynejpiña rikhurenqa, chaynejpitaj tiyakonqanku Benjamimpa punkunmantapacha Esquina punkukama. Chaypi ñaupa punku karqa. Jinataj Hananeelpa torrenmantapacha reypa aceitenta ruwanasninkama.

¹¹ Arí, Jerusalempi runas tiyakonqanku mana imata manchachikuspa.

¹² Chay llajtakuna, piskunachus Jerusalempa contranta maqanakorqanku, chaykunataqa Señor sinch'ita jasut'enqa. Chay runaspataqa sayashajtillanku aychanku ismuponqa, ñawisninkupis, ñawi t'oqosnillankupi ismuykaponqa, qallusninkupis simisninku ukhullapi ismuykaponqa.

¹³ Jaqay p'unchaypi Señorqa mayta manchachenqa. Sapa uj wajpa makinmanta jap'enqa, oqharenqankutaj makinkuta ujkuna ujkunaj contrampi.

¹⁴ Chaypachaqa Judá Jerusalempi maqanakullanqataj, chay qayllapi llajtayojkunaj may chhika qhapaj kayninkumanta qolqeta qorita chantá p'achastapis qhechuranqanku.

¹⁵ Runasqa, ima jasut'imanchus urmarqanku chay jasut'illawantaj jasut'isqas kanqanku, chay caballos, mulos camellos, burros jinataj tukuy uywakunapis chay jaraspi kashajkunaqa.

¹⁶ Chay qhepatarí, Jerusalempa contrampi maqanakonqanku chay kikin llajtasmanta puchojkunataj watan watanta renqanku Reyta yupaychaj, chay Tukuy Atiyniyoj Señorta. Ramadas nisqa fiestataj Payman ruwanqanku.

¹⁷ Sichus chay mayqen jallp'amantapis mana rinmanchu Jerusalenman chay Tukuy Atiyniyoj Señorta Reytataj yupaychaj chayqa; chay jallp'apeqa mana para kanqachu.

¹⁸ Egipciospis mana renqanku chayqa, Señor jasut'illanqataj, ajinallatataj mayqen llajtallapis mana ruwanqachu Ramadas nisqa fiestata chaykunatapis.

¹⁹ Chay Egiptoj jasut'enqa kanqa pi llajtapis Ramadas nisqa fiestata ruwanqachu chaykunatapis.

²⁰ Chay p'unchaypirí, caballospa campanillasnintimpi kay jina qhelqasqas kanqanku: Señorpaj t'aqasqa, nispa. Yupaychana wasimanta mankaspis, jinataj chay altarpa ñaupaqempi kashanku chay vasospis t'aqasqasllataj kanqanku.

²¹ Judapi, jinataj Jerusalempi mankasqa Tukuy Atiyniyoj Señorman t'aqasqas kanqanku. Pillapis uj rikuchikuta qoyta munajqa chay mankasta oqharispa, uywaspa aychanta chayachispa qoyta atillanqa. Chay p'unchaypeqa manaña kanqachu qhatojkuna Tukuy Atiyniyoj Señorpa yupaychana wasimpi.