Zacarías 12 - Qheshwa Biblia DC

Jerusalempa librasqa kasqan

^1-2 Kayta, Israelmanta Señor parlarqa: Señor pichus janaj pachata aysarqa, kay pachatapis sayacherqa, runamampis kausayta qorqa, ajinata nisunkichej: Qhaway, Jerusalenqa uj vinoyoj vasota jap'enqa; tukuy qayllampi kaj llajtakunatataj machaykuchenqa. Maypachachus chaykuna Jerusalenman maqanakoj yaykonqanku chaypacha, Judamanta kaj waj llajtasmampis yaykullanqankutaj.

³ Jaqay tiempopeqa, Jerusalenta jatun llasa rumiman jina tukuchisaj jaqay tukuy llajtaspaj. Noqa t'unasaj pichus oqhariyta munajtaqa. Tukuynejmanta Jerusalempa contrampi naciones tantaykukonqanku.

⁴ Chaypacha manchariykuchisaj caballosninkuta, lloq'asqa rejkunatataj locoyaykuchisaj. Chay llajtakunaj caballosninkoj ñawisnintataj chherqoyarachisaj. Judajpa ayllunmanta kajkunatataj waqaychasaj.

⁵ Kayta rikuspataj, Judajpa kurajkunasnenqa sonqonku ukhullapi nenqanku: Tukuy Atiyniyoj Señormin, Jerusalempi tiyakojkunaspa Diosninkoqa, payllataj kallpachajninkoqa.

⁶ Jaqay tiempopeqa, Judamanta kurajkunasnenqa llant'a ukhupi nina brasas k'ajarishajta jina ruwasaj, trigo q'apis ukhupi uj k'anchanata jina ruwasaj. Jerusalenmanta qayllapi kaj llajtakunata lloq'emantaj pañamantaj tukurachenqanku, Jerusalempi tiyakoj kanku chaykunataj watejmanta kutiykaponqanku chay llajtankupi tiyakapoj.

⁷ Ñaupajtaqa, noqa Señor salvasaj Judajpa ayllunmanta kajkunataraj, jinamanta Davidpa wawasnin nitaj Jerusalempi tiyakojkunapis, Judaj ayllunmanta astawan jatunyaspa runaykachanankupaj.

⁸ Noqa Señor waqaychasaj Jerusalempi tiyakojkunata. Aswan kallpayoj kajkunamanta rey David jina kallpasapasman tukonqanku, Davidpa ayllunmanta kajkunataj Dios jina karenqanku, Señorpa angelnin jinataj paykunaj ñaupaqenkuta renqanku.

⁹ Jaqay p'unchaypeqa, mayqen naciompis Jerusalenta maqaj yaykojtaqa tukuyninta tukuchisaj.

¹⁰ Davidpa mirayninman, jinataj Jerusalempi tiyakojkunaman khuyakoj Espirituyta qosaj. Diosmanta mañakoj Espirituytataj qosaj. Jinamantaraj qhawarenqanku pitachus t'ojsinawan wañucherqanku chayta, may jinatataj llakikonqanku, waqanqankutaj Paymanta imaynatachus uj k'ata kuraj wawanku wañojtin waqanku ajinata.

¹¹ Jerusalempeqa manchay llakiy waqaykunas kanqa, imaynatachus chay Hadad-rimen dioskunasninmanta Meguido pampaspi llakiy waqaykunasta ruwanku jinata.

¹² Chay jallp'apeqa, sapa ayllumanta waj wajta llakikuyninkuta ruwanqanku: Davidpa ayllunmanta kajkuna, jinataj warmisnintin, Natámpa ayllusninmantapis warmisnintillantaj.

¹³ Levejpa ayllusninmanta warmisnintin, jinataj Sesmeej ayllunmantapis warmisnintin.

¹⁴ Ajinallatataj tukuy waj ayllukunapis warmisnintillantaj, sapa uj waj wajta llakirakonqanku.