Zacarías 11 - Qheshwa Biblia DC

¹ Líbano, kichariy punkusniykita, cedrosniykitataj nina ruphaykuchun!

² Oh, pino, waqay imaraykuchus cedro urmanña, imaraykuchus jaqay may k'achitu sach'aspis q'ala urmasqasña rikhurinku! Waqaychej, qankuna, Basampa sach'asnin, imaraykuchus chay k'iski sach'as urmasqasña kanku!

³ Michejkunapis mayta waqashanku, imaraykuchus k'achapaj qhawasqas kasqanku pastosqa chinkachisqaña kanku. Leompa qhaparqachasqasnin uyarikun, imaraykuchus Jordán mayoj may k'acha k'iski sach'asniyoj kasqan q'ala chinkachisqaña.

Iskay michejkuna

⁴ Kayta niwarqa Señor Diosniy: Wañuchinapaj kashan chay ovejasta michimuy.

⁵ Rantikojkunaqa wañuchinku manapis jucha kasqanta yuyaspa, vendekunarí ninkutaj: Graciasta qoni Señorman. Payrayku qhapajña kani, nispa. Ni kikin michejkunapis paykunamanta khuyakunkuchu.

⁶ Ajinallatataj, noqapis kay llajtapi tiyakojkunamantaqa manallataj khuyakusajchu. Manachayqa runa masinkoj makinman, jinataj reyninkoj makinman jaywaykusaj. Kaykunataj jallp'api tukuy kajta chinkachenqanku, ni pitapis makinkumanta salvasajchu. Noqa Señor chayta nini.

⁷ Jinaqa, wañuchinapaj t'aqasqa karqa chay ovejasta michej churakorqani. Chayta ruwarqani rantejkunaj cuentankupi. Chaymanta iskay tojnusta oqharikorqani; ujninta suticharqani khuyakuyta, chay ujnintataj ujchakuyta.

⁸ Uj killallapi kinsa michejkunata wijch'orqani, manaña pacienciay paykunapaj kapuwasqanrayku, chejniwasqankuraykutaj.

⁹ Ovejasmantaj nerqani: Manaña ujtawan qankunata michiykichejmanñachu! Pichus wañunan tiyan, wañuchun. Mayqenchus chinkanan tiyan chayqa chinkachun. Mayqenkunachus qhepakojkunarí, ujkuna ujkunata mikhunakuchunku, nispa.

¹⁰ Chaymanta khuyakuy nisqa tojnuyta oqharerqani. Chantá p'akirparerqanitaj. Chay niyta munarqa: Dioswan chay ayllukunawan tratonku p'akisqa kasqanta.

¹¹ Chay p'unchaypi chay trato p'akisqa karqa. Chay ovejasta rantikojkunaqa, noqata rikuwajkunataj ruwasqasniynejta, Dios parlasqanta repararqanku.

¹² Chaypacha nerqani paykunata: Allinman rijch'asunkichej chayqa, jornalniyta pagapuwaychej, manachayqa saqellaychej. Jinamanta pagapuwarqanku kinsa chunka qolqesta.

¹³ Señor niwarqa: Jap'iy chay qolqesta, imaraykuchus chay k'acha preciota churawasqankumin, yupaychana wasej qolqesninmantaj churaykapuy. Noqataj chay kinsa chunka qolqeta jap'iytawan yupaychana wasej qolqesninman churaykaporqani.

¹⁴ Qhepantataj chay ujchakuy nisqa tojnutañataj p'akerqani, jinamanta Judaman Israelwan wauqentin kasqankoqa t'ipisqa karqa.

¹⁵ Señor niwarqa: Kunanqa uj wampu michejpa p'achasninwanñataj p'achalliykukuy.

¹⁶ Kay jallp'aman churasaj uj michejta; chay michejqa mana watukonqachu chinkasqa ovejastaqa, nitaj mask'aj churakonqachu, nitaj nanasqasnintapis jampirenqachu, mana puriyta atejkunatapis mana yanaparenqachu, manachayri wira kajpa aychanta mikhuykakaponqa, ni chaki sillusnillantapis puchurenqachu.

¹⁷ Ay, imachus kanqa jaqay uywanta saqerpayaj wampu michejmantaqa. Espadawan makin phirisqa kachun, jinataj paña kaj ñawinmampis t'ojsichun! Makintaj ch'akipuchun, chay ñawimpis wiñaypaj chherqoyachun.