Zacarías 10 - Qheshwa Biblia DC

Judá jinataj Efraín librasqas kanqanku

¹ Señormanta mañaychej ñaupaj parasta, Señortaj pichus lliuj q'ajkunasta ruwan, payllataj ashkhata parachimusonqachej, tukuypajtaj campopi qhorasta wiñachenqa.

² Lantikunaj nisqasninkoqa llullamin, qhasilla chay yatirispa yachani nisqasninkupis. Qhasillata mosqokuytawan imatapis ajina kanqa ninku, sonqochakoj jina parlasqankupis ch'usajlla. Chayraykumin aylloyqa chinkasqa oveja jina thamaykachashan, ñak'arispa mana michejniyoj jina.

³ Chayrayku nin Señorqa: Phiñakuyniy astawan k'ajarin michejkunaspa contrampi, jasut'isajtaj kay aylluyta pusaykachajkunata. Tukuy Atiyniyoj Señor, Judajpa mirayninmanta chay tropanta waqaychan. Paykunamantarí uj maqanakupaj may kallpayoj caballota jina ruwanqa.

⁴ Paykunamanta llojsenqa Esquina Rumi, Toldo estacapis, maqanakupaj Arcopis. Paykunamanta llojsenqanku maqanakupaj sinch'i runaspis.

⁵ Soldados jina kankichej, imaynatachus maqanaku kajtin tukuy ñankunaspi t'uruta sarunku, ajinata ruwankichej. Maqanakunkichej imaraykuchus Señor qankunawan kanqa jinamanta caballospi purejkunapis p'enqachisqas kanqanku.

⁶ Señor nin: Judajpa mirayninmanqa noqa kallpata qosaj, Josejpa miraynintaqa salvasajtaj. Watejmanta llajtankuman pusallasajtaj, paykunamanta khuyakusqayrayku. Paykuna tukukonqanku manapis jayk'aj paykunata qhesachaymanchu karqa ajinaman, noqa Señor Diosninku kasqayrayku, mañakuwasqasninkutataj uyarisaj.

⁷ Efraenqa uj soldado jina kanqa. Sonqonqa vinowampis kashanman jinata kusikonqa. Chayta rikuspari wawasnimpis kusirikullanqankutaj. Sonqonqa kusikonqa Señorrayku!

⁸ Noqa wajyakapusaj, tantaykusajtaj paykunata salvasqayrayku. Chay waj tiempopi jina ujtawan may chhikaman ashkhayallanqankutaj.

⁹ Tukuy llajtasnejta noqa ch'eqeracherqani, chaywampis may karupi kashaspapis noqamanta yuyarikuwanqankupuni. Uj p'unchaytaj kutimonqanku wawasninkuwan khuska.

¹⁰ Egiptomanta kutirichimuspa Asiriamantapis, pusamusaj apasajtaj Galaadman, jinataj Libanomampis. Ashkha kasqankurayku manaña paykunapaj campopis kanqañachu.

¹¹ Egipto mar qochata pasanqanku, oladasnin kajtapis maqaspa ch'inyachisaj. Nilo mayutapis ukhusninkama ch'akichisaj, Asiriaj may runaykachasqantapis chinkachisaj, Egiptoj atiynintapis tukuchisaj.

¹² Noqa paykunata kallpachasaj, sutiypitaj ñaupajman purenqanku. Noqa Señor kayta nini.