Tito 2 - Qheshwa Biblia DC

Cheqa kaj yachaykuna

¹ Qanqa, parlay cheqa kaj yachachiyman jina.

² Machu runasqa kachunku ch'aki sonqos, allin qhawasqas, yachayniyoj, cheqa kaj feniyoj, munakuypi, pacienciayoj ima.

³ Jinallataj paya warmispis allimpaj qhawasqas kachunku, maychus kanankupi; ama pita tumpaspa, ama machaspa, allin kajta yachachispa.

^4-5 Yachachichunku sipas warmista, qosasninkuta munakunankuta; jinallataj wawasninkutapis; allin warmis llimphu sonqoyoj kanankupaj, wasisninkuta allinta qhawanankuta, k'achas kanankuta, qosasninkuwan ujchasqas, ajinapi Diosninchejpa palabran ama qhesachasqa kanampaj.

⁶ Ajinallatataj, wajkunatapis k'amispa kallpachay, sumaj yuyayniyoj kanankupaj.

⁷ Qan kikiyki allin kausayniykita rikuchiy tukuy imapi, yachanankupaj jina allin ruwayniykimanta; chay yachachiyniykipi rikuchispa tukuy ima respetowan, tukuy sonqowantaj.

⁸ Cheqanta parlaspa mana pipis k'amiyta atinampaj jina; ajinapeqa contrallejpis p'enqakonqa, manataj qankunapaj sajrata rimanqañachu.

⁹ Kamachismampis yachachillaytaj, patronesninkuta kasunankuta tukuy imapi, ama kutichikuspa ni ima nisqapi.

¹⁰ Yachachillaytaj ama suwas kanankuta, tukuy imapi allin junt'aj kanankuta; ajinamanta tukuy imapi Dios Salvadorninchejpa yachachiyninta allimpi rikuchinankupaj.

¹¹ Dios rikuchiwanchej khuyakuyninta, tukuy runas salvasqas kanankupaj.

¹² Yachachiwanchej Diospa contrampi kajkunata saqenata, kay mundoj sajra munaynintapis. Astawanqa kay mundopi maychus kajta kausana, cheqanta, Diosta yupaychaspa.

¹³ Yachachillawanchejtaj suyananchejta chay kusikuyniyoj p'unchay jamunanta, maypachachus jatun Dios Salvadorninchej Jesucristo janaj pacha k'anchayninwan rikhurimunanta.

¹⁴ Pay kikin noqanchejrayku wañuyman rerqa, sajra kajmanta kacharichinawanchejpaj, llimphuchawanchejtaj paypa ayllun kananchejpaj, k'uchita tukuy imata allinta ruwanachejpaj.

¹⁵ Kayta parlay, yachachiytaj, k'amispa tukuy atiyniykiwan. Amataj qanta pipis qhesachasuchunchu.