Tito 1 - Qheshwa Biblia DC

Pabloj napaykuynin

¹ Noqa Pablo, Diospa kamachin, Jesucristoj apostolnintaj kani; Diospa ajllasqasninta creeyman pusanaypaj, cheqa kajtataj rejsinankupaj, Diosta yupaychana kasqanman jina.

² Wiñay kausay suyaypi, mayqentachus mana llullakoj Dios qosqaykichej nerqa, manaraj kay mundo ruwasqa kashajtin.

³ Maychus tiempompitaj rikuchisqa karqa palabran willaykunanejta; chaytaj noqaman qosqa karqa, Salvadorninchej Dios kamachisqanrayku.

⁴ Tito, kay cartata escribimuyki, qanman pichus cheqamanta waway kanki khuska creesqanchejpi. Khuyakuy, sonqo tiyakuy, Dios Tatamanta, Señor Jesucristo Salvadorninchejmantawan qanwan kachun.

Kurajkunaj ruwaynin

⁵ Creta churupi saqerqayki, imaschus ruwanaraj kasqanta ruwanaykipaj, sapa llajtapi kurajkunata churanaykipaj, kamachisusqayman jina.

⁶ Kurajqa mana imamanta k'amina kanan tiyan, uj warmiyojlla. Wawasnintaj creejkuna kananku tiyan, manataj sajra kausaymanta ch'atanas, nitaj mana kasukojkuna.

⁷ Iglesiapi uma kajqa mana k'amina kanan tiyan, Diospa mayordomon jina, mana jatunchakoj, mana usqhayllata phiñakoj, mana machaj, mana maqanakoj, nitaj qolqeta munapayaj.

⁸ Astawanqa wasinman wajyakoj kanan tiyan, allin kajta munakoj, sumaj yuyayniyoj, cheqan kajta ruwaj, juchamanta t'aqasqa, kausaynimpitaj mana juchawan atipachikoj.

⁹ Cheqa kaj palabrata yachakusqanman jina, paypis wajkunata sonqochanampaj allin yachachiywan, churanakojkunatapis atipanampaj.

¹⁰ Ashkha tiyan mana kasukojkuna, mana kajta parlajkuna, ch'aukiyajkuna. Kaykunamanta astawanqa kanku circuncisionmanta kajkuna.

¹¹ Chaykunataqa ch'inyachina tiyan. Chaykunaqa pejtunku wasintinta mana kajta yachachispa, qhasimanta qolqeta jap'ispa.

¹² Uj Creta llajtayoj profeta llajta masisninmanta paraspa nerqa: Cretensesqa llullas kanku, k'ita uywas jina, mikhunawan mana sajsay atejkuna, qhellastaj.

^13-14 Kay nisqayqa cheqapuni. Chayrayku sinch'ita k'amiy, feninkupi paykuna allin kanankupaj, ama kasunankupaj judiospa llulla yachachiyninkuta, nitaj runakunaj kamachisqankutapis cheqa kajmanta t'aqasqa kajkunamantapis.

¹⁵ Llimphuspajqa tukuy ima llimphu; juchasapaspajqa, Diospi mana creejkunapaj, mana imapis llimphuchu, imaraykuchus yuyayninku, sonqonkupis juchawan ch'ichichasqas kanku.

¹⁶ Yuyanku Diosta rejsisqankuta, ruwasqasninkuwantaj payta qhesachanku. Millaykuna mana kasojkuna kanku, nitaj allin kajtapis ruwayta atinkuchu.