TAKIYKUNA 8 - Qheshwa Biblia DC

¹ Sichus qan hermanoy kawaj, mamaypa ñuñunwantaj wiñasqa kawaj chayqa, qanta taripaytawan much'aykuykiman; jinamanta runasqa mana p'enqachiwankumanchu.

² Chantapis noqaqa mamaypa wasinman pusaykuykiman; qantaj yachachiwankiman. Chanta sumaj kaj vinota noqaqa ujyachiykiman, sumachajnin kaj granadasniymanta ch'irwasqawan.

³ Lloq'e makinta umay uraman churachun, paña makinwantaj ojllaykuwachun.

Qhari

⁴ Jerusalenmanta kaj sipaskuna mañakuykichej, munasqaytaqa ama rijch'arichipuwankichejchu, mashkha unaytachá puñuyta munasqanta puñukuchun.

- 6 - Coro

⁵ Pitaj ch'in pampamanta jamushanri, munasqampa kunkanman atiykukuspari? Manzana urapi rijch'aricherqayki, maypichus mamayki nanaywan jap'ichikorqa chaypi, maynejpichus qanta paqarichikusorqa chaypi.

Warmi

⁶ Sonqoykiman apakuwan ari, makiykipi ñit'isqa señalta jina; Munakoyqa sinch'ipuni puñuy jina. Chay munapayayqa anchapuni uj sepultura jina. Munakoyqa nina brasas jina k'ajarin, manchaytaj Señorpa ninan jina.

⁷ Ashkha yakuspis munakuytaqa mana thasnunmanchu, nillataj mayu yakuspis chinkachinmanchu. Sichus uj runa imachá wasimpi kapusqanta, munakuyrayku qoyta munanman chayqa, cheqamanta chay runataqa pisipaj qhawankuman.

Coro

⁸ Uj juch'uy hermanita tiyapuwanchej; manaraj paypata ñuñusnin kanchu; payta mañaqakoj jamojtinku imanasuntajri?

⁹ Sichus uj perqa kanman chayqa, chay perqa patapi uj palaciota ruwasunman. Sichus uj punku kanman karqa chayqa, patanman cedro tablaswan wisq'aykusunman.

Warmi

¹⁰ Noqaqa uj perqa jina kani, ñuñusniypis torres jina. Chayrayku paypa ñaupaqempi kusiyta tariniña.

¹¹ Salomompata uj uvas chajran Baal-hamompi karqa. Chayta saqerqa qhawajkunaman, sapa uj waranqa qolqeta poqoyninmanta apamunanku karqa.

¹² Noqajta chay uvas chajraqa, chaytaj ñaupaqeypi kashan. Qampajqa Salomón waranqa kanqa, iskay pachajtaj qhawaspa poqochejkunapaj.

Qhari

¹³ Huertas ukhupi tiyakoj warmi, kausaqesninchej parlasqaykita uyarinku. Noqamampis chay parlasqaykita uyarichiway.

Warmi

¹⁴ Usqhayta correy ari, munasqáy; taruka jina phinkiriy, chayri uña taruka jina k'achituta q'aparishaj lomasninta.