TAKIYKUNA 5 - Qheshwa Biblia DC

Qhari

¹ Noqa huertayman yaykuniña, hermanitáy, noviáy. Noqaqa mirraytawan, sumajta q'apashaj jawinasniytawan jap'ikapuniña. Panalniypa, misk'intapis mikhuniña. Vinoytawan, lecheytawampis ujyaniña. Munasqa kausaqesníy, mikhurikuychej, ujyarikuychej sajsanaykichejkama.

Coro - 4 - Warmi

² Noqaqa puñorqani; chaywampis, sonqoyqa mana puñusharqachu. Noqaqa uyarerqani munasqay punkumanta wajyamuwajta: Kicharimuway, chunkitúy, hermanitáy, palomitáy. Umayqa chhullawan joq'opachaña. Ch'isin chay jinatapuni sayk'umojtin chujchasniymanta yaku sut'uramushan.

³ P'achayta lluch'ukorqaniña, imaynatataj ujtawan p'achayta churakusajri! Chakisniytapis yakuwan mayllakorqaniña, kunanqa ujtawanchu ch'ichichakusaj imatajri!

⁴ Munasqayqa punku jusk'unta makinta jaywaykamun, sonqoytaj manchayta ras niriwarqa.

⁵ Noqaqa sayariytawan, munasqay yaykumunampaj punkuta kicharerqani; kicharishajtiytaj makiymanta mirra ch'aqarparin dedosniynejta punku wisq'anata corremuspa.

⁶ Punkuta kicharinaypajtaj munasqayqa ripusqaña, manaña chaypichu kasqa. Ajinata parlamusqan chinkapojtintaj sonqoyqa waj jinaman tukorqa. Mask'arqani, manataj tarikaporqanichu; qhasillataña wajyarqani manaña uyarimuwarqachu.

⁷ Llajtata qhawaspa muyoj runas taripawaytawan, maqaspa nanaykuchiwarqanku. Perqa patamanta qhawaj soldadostaj mantayta qhechuwarqanku.

⁸ Jerusalenmanta sipaskuna, qankunamanta mañarikuykichej, munasqaywan tinkukunkichej chayqa, willaripuwaychej munakuymanta wañupusqayta.

Coro

⁹ Munasqaykeqa imapitaj k'atalla kasqari, tukuy warmismanta aswan k'achita warmi? Munasqaykeqa aswan sumajpunichu, ajinatachu qanqa uj tratota ruwayta munankipajri?

Warmi

¹⁰ Munasqayqa chunka waranqa runas ukhupi sut'i rejsikun. Payqa k'achataj kallpayojtaj.

¹¹ Uyanqa qori jina, chujchasnintaj chhurkus, cuervo nisqa jina yana.

¹² Ñawisnenqa yaku cantopi kashaj palomas jina, lechewan mayllasqas jina.

¹³ Uyitasnenqa k'achituta q'apajkuna jina, q'aparishaj t'ikas jinataj. Simi puntasnenqa t'ikaj laphisninmantapis k'acha q'apaj imas sut'umushanman jina.

¹⁴ Makisnenqa qori sortejas jina, jacinto nisqa rumiwan k'achanchasqa. Ukhonqa marfil nisqa tulluwan llusk'achasqa, zafiro nisqa rumiwampis patanman k'askaykuchisqa jina.

¹⁵ Chakisnenqa mármol nisqa rumi jina, sayantaspis sumaj qori chukus patapi sayashanman jina. Qhawaykachaynenqa Líbano jina, sumaj ajllasqataj cedro sach'a jina.

¹⁶ Parlaynenqa misk'i k'achitutaj, tukuy munapayanampaj jina. Ajina ari noqaj munasqayqa. Ajina ari munakusqayqa, Jerusalenmanta kaj sipaskuna.