TAKIYKUNA 3 - Qheshwa Biblia DC

¹ Ch'isisnin puñunaypi puñushaspa, sonqoypa munakusqanta mask'arqani, nitaj tarikaporqanichu.

² Chanta nerqani: Kunampacha jatarikusaj, llajtata tukuynejta mask'amusaj; tukuy callesnejta, plazasnejta sonqoypa munakusqanta mask'akampusaj, nispa. Mask'amuspataj mana tarerqanichu.

³ Llajtata qhawaspa muyoj soldados taripawarqanku, paykunatataj tapurikorqani: Manachu sonqoypa munakusqanta rikupuwarqankichej?, nispa.

⁴ Paykunamanta uj chhikanta karuncharikuytawantaj, sonqoypa munakusqanwan tinkukunipacha. Makinmanta jap'iykuytawantaj manaña kacharikorqanichu, mamaypa wasinman pusaykunaykama.

Qhari

⁵ Jerusalempi kaj sipaskuna, noqa mañarikuykichej, campopi tarukasrayku, uña tarukasrayku ima: Munasqayta ama rijch'arichipuwaychejchu. Saqepuwaychej puñukojta, rijch'arinankama.

- 3 - Coro

⁶ Imataj chayri? Ch'in pampamanta q'osñi jina rikhurimushan chay? Mirrawan, inciensowan, tukuy ima sumaj q'apaykunawan q'aparishajri?

⁷ Chayqa Salomompa wantunan. Jamushantaj sojta chunka sumaj wapu Israelpa soldadosnimpa chaupillanta.

⁸ Tukuyninkutaj sumajta espadasta apaykachanapaj jina kanku, sapa ujninkutaj sumajta maqanakuyta yachanku. Sapa ujninku espadasninkutaqa cinturankupis apaykachachunku, ch'isisnin imapis kananta yuyaspa.

⁹ Rey Salomonqa uj wantunata paypaj ruwachiporqa, Libanomanta sumaj kaj maderawan.

¹⁰ Chay wantumpa sayantasnenqa qolqemanta karqa, jawa ladontaj qorimanta. Tiyanantaj puka telamanta sumaj sirasqa karqa. Chay ukhuntataj Jerusalenmanta kaj sipaskuna, munakuywan ruwasqa imaswan k'achancharqanku.

¹¹ Sión llajtapi kaj sipaskuna, llojsimuychej, Rey Salomonta qhawarej. Payqa kashan umampi k'acha pilluyoj; chay pillutaqa casarakushajtin maman pillucherqa, mayta kusikusharqa chay p'unchaypi.