TAKIYKUNA 2 - Qheshwa Biblia DC

Warmi

¹ Noqaqa Sarón vallemanta t'ika kani; pampasmanta rosa t'ika kani.

Qhari

² Imaynachus rosa t'ikaqa khishkas chaupipi, ajinallataj munasqatayqa sipaskuna chaupipi.

Warmi

³ Manzanapis sach'aspa chaupimpi kashanman jina, noqaj munasqayqa wayna runaspa chaupimpi kashan. Chay sach'aj moq'ey llanthumpi noqaqa tiyarikuni, poqoynintaj noqapajqa sumaj misk'i.

⁴ Maypichus sumaj mikhuykunata mikhunku chayman pusawarqa, qhawaykachasqanwantaj noqataqa, mayta munakuwarqa.

⁵ Uvas k'isasta mikhuchispa kallpachawaychej, manzanata mikhuchiwaychej, imaraykuchus munakuymanta wañushaniña.

⁶ Lloq'e makinwan kunkaymanta jap'iriwachun, paña makinwantaj ojllaykuriwachun.

Qhari

⁷ Jerusalempi kaj sipaskuna, noqa mañarikuykichej, orqospi tarukasrayku, uña tarukasrayku ima, munakusqaytaqa ama rijch'arichipuwaychejchu. Saqepuwaychej puñukojta, rijch'arinankama.

- 2 - Warmi

⁸ Munasqayqa jamushanña; parlamusqanta uyarishaniña. Payqa orqos patasta, jinallataj loma patasninta phinkirispa jamushan.

⁹ Munakusqayqa uj taruka jina, juch'uy tarukita jina. Kay perqa wasapiña kashan, ventanaman qayllaykuspaña qhawamushan; chay wasamantaña wateqamushan.

¹⁰ Munakusqayqa kay jinata niwarqa: Sayariy, munakusqáy, jampuwaytaj; jaku, chunkitúy.

¹¹ Qhawariy, chiri tiempoqa tukukunña, parapis chay chirawiwan khuska ripunña.

¹² T'ikaspis campospi p'utumushankuña, takirikuna tiempoqa chayamunña. Juruk'utitaspis kay llajtanchejpeqa “uy, uy”, nishankuña.

¹³ Higos sach'aj poqoynin rikhurimushanña, uvas sach'aspis q'erqespa q'aparimunkuña. Sayariy, munakusqáy, jampuwaytaj chunkitúy.

¹⁴ Palomitáy qanqa chhanka jusk'usman pakakunki, millay manchachikuna chhanka jusk'usman pakaykukuwanki. Uyaykita rikurichikuway ari, parlapayarimuway ari. Qampa palabraykeqa sonqoyta t'ikarichiwan, qhawaykachasqaykipis k'acha.

Iskayninku

¹⁵ Atojkunata wañurachichunku, chay uña atojkunata, uvas chajrasta t'ustejkunata t'ikapi kashanku chay uvas chajrasninchejta.

Warmi

¹⁶ Noqaj munasqayqa noqajta, noqapis papata kani. Payqa ovejasninta rosa t'ikas ukhupi michin.

¹⁷ P'unchay kashajtin, amaraj ch'isiyaykushajtin, kutimuypuni ari, munakusqáy; qanqa kay uj taruka jina, uña taruka jina Beter orqospi kaj jina.