TAKIYKUNA 1 - Qheshwa Biblia DC

TAKIYKUNAMANTA ASWAN SUMAJ TAKIY

¹ Takiykunamanta aswan sumaj takeyqa Salomompa ruwasqan.

- 1 - Warmi

² Simiykiwan much'aykuriway ari! Munakuyniykeqa vinomantapis aswan misk'i.

³ K'achituta q'aparishan, jawiykunasniyki q'apashaj jawiykunamanta astawan. Sutiykeqa q'apashaj jawinatapis jich'arpasunman jina. Chayrayku, sipaskunaqa sinch'ita munakusunku.

⁴ Pusarikuway ari; iskayninchej khuska risunchej. Reyníy, wasiykiman pusakapuwan ari. Qanwan may kusiywan kusikusunchej; chaypitaj yuyarisunchej munakuwasqaykimanta, vinomantapis aswan misk'i chayta. Chayrayku qanta sipaskunaqa mayta munakusunku.

Coro Warmi

⁵ Jerusalén sipaskuna, noqaqa yana kani, jinapis k'achita; Yana kani, Cedarpa toldosnin jina; K'achita kani, Salomompa jark'achina telasnin jina.

⁶ Ama yana kasqaytaqa qhawawaychejchu, nitaj ruphay yanayachiwasqantapis. Kikin turasniy noqapaj phiñarikorqanku; uvas chajrasta qhawajta saqewarqanku, kikin uvas chajraytataj saqerparini.

⁷ Yachanaypaj willaway ari, munakuwajníy. Maypitaj ovejasniykitaqa michimunkiri? Chaupi p'unchaytaqa mayman qhatispataj samarichimunkiri? Imaraykutaj noqa uj puriskiri jina puriymanri?, kausaqesniykej uywasnillanta qhawaspari?

Coro

⁸ K'achitasmanta aswan k'achita, mana yachanki chayqa, ovejaspa lastronta qhawarispa rillay. Cabritasniykita michikamuy, michejkunaj ch'ujllasnin chaynejpi.

Qhari

⁹ Munakusqetáy, qanqa noqajta kanki; faraompa carretanta qhatatej caballo jina k'achita kanki.

¹⁰ Uyitasniykeqa k'achitas kanku, ningriykimanta faluchos chaupipi; walqayoj kunkaykipis k'achitu.

¹¹ Faluchostaqa qorimanta ruwapusqayku, qolqewan cantosnin k'achanchasqata.

Warmi

¹² Rey mesampi tiyakushajtin, nardo t'ikay q'aparirin.

¹³ Munakusqay noqapajqa uj maki q'apiy mirra jina; samarikuntaj ojllayniypi.

¹⁴ Munakusqay noqapajqa, En-gadipi uvas ukhupi alheña t'ikas jina.

Qhari

¹⁵ Qanqa k'achita kanki, munasqetáy, k'achitapuni kanki, ñawisniykeqa iskay irpasman rijch'akun.

Warmi

¹⁶ K'achitu kanki, munakusqáy; k'achitu kanki. Q'omer qhoraqa puñunanchej.

Qhari

¹⁷ Wasinchejpa kurkusnenqa cedromanta, cipreses nisqa maderamanta techasqataj.