Sofonías 2 - Qheshwa Biblia DC

^1-2 Tukuyniykichej tantaykukuychej, mana p'enqayniyoj runas, manaraj apachikushajtiykichej, imaynatachus ichhus uj p'unchayllapi wayrawan apachikunku ajinata. Manaraj Señorpa lauraj phiñakuynin qankunaman chayamushajtin. Manaraj Señorpata k'ajaj phiñakuynimpa p'unchaynin qankunaman chayamushajtin.

³ Qankuna kay pachapi pisi kapuyniyojkuna tukuyniykichej Señorta mask'aychej, jinallataj kamachisqasninta junt'ajkuna, cheqa kaj imasta ruwaychej k'umuykukuychejtaj. Ajinamanta ichapis waqaychasqas kankichej Señorpa phiñakuynin p'unchaynimpi.

Mana israelitaspis jasut'isqas kanqanku

⁴ Gaza llajtaqa ch'in pampa qhepakonqa. Ascalontaj ch'impacha saqesqa kanqa. Asdodpi tiyakojkunataj chaupi p'unchaypi wijch'usqas kanqanku. Ecrompi kajkunataj saphinmantapacha t'irasqas kanqanku, imaynatachus sach'aqa saphimantapacha sik'ikun ajinata.

⁵ Way qankunamanta, Cretapi kajkuna, qocha cantopi tiyakojkuna. Dios nin kayta contraykichejpi: Canaán, filisteospata llajtan, t'unaykusqayki, mana uj runayojta saqerpayasqayki!

⁶ Qocha cantopi kaj llajta uywasta michinasman tukuchisqas kanqa, michejkuna chaypi tantakunankupaj, ovejaspaj corrales ruwakunankupajtaj.

⁷ Judá ayllumanta kausaypi puchojkunataj chay runaspa jallp'ankuta jap'ikaponqanku, maypachachus Señor Diosninku paykunata yanapaj jamonqa, preso kaymantataj paykunata kutirichimonqa chaypacha, jaqaypitaj ovejasninkuta michenqanku. Tutasnimpitaj samarikonqanku Ascalompi kaj wasispi.

^8-9 Tukuy Atiyniyoj Señorqa, Israelpa Diosnenqa kay jinata nin: Uyarini Moab runaspa mana allinta parlasqankuta, Amón llajtayoj runaspa burla ruwakusqankuta ima, imaraykuchus paykunaqa runasniypaj sajrata parlanku. Paykunaqa runasniypa jallp'ankuwan jatunyakunku. Chaynejta, kausayniyrayku juramentota ruwani. Moab llajtaqa Sodoma jina jasut'isqa kanqa. Amompi tiyakoj runastaj Gomorrapi tiyakoj runas jina qhepakonqa. Chay jallp'astaj khishkas pampaman tukonqa. Kachi orqhona jinataj wiñaypaj uj ch'in pampa qhepakonqa. Llajtaymanta kausaypi puchojkunataj paykunamanta qhechuranqanku, chanta jallp'ankupitaj qhepakonqanku.

¹⁰ Chay jina pagota jap'enqanku Moab llajtaqa, jinallataj Amompis, Señorpa ayllunwan burla ruwakusqankurayku. Tukuy Atiyniyoj Señorpa ayllunwan jatunyasqankuraykutaj.

¹¹ Señorqa may manchachikuna kanqa paykunaj contrankupi. Chay llajtapi tukuynin lantista t'unaykonqa. Tukuynejpi paylla yupaychasqa kanqa. Qocha chaupi churuspi runaspis paytaqa yupaychanqanku.

¹² Ajinallataj qankunapis Etiopiamanta kajkuna, Señorpa espadanwan t'ojsisqas wañonqanku.

¹³ Payqa makinta oqharenqa chimpa ladoj contranta, Asiria llajtata t'unaykunampaj. Nínive llajtatarí ch'impachata saqerparenqa, uj ch'in pampaman tukuchispa.

¹⁴ Wasisninkumanta k'aspis orqhorasqas kanqanku, chay raqayespitaj oveja tropas wisq'akonqa, chanta tukuy laya campo animalestaj kakonqanku. Juku, khirkinchu ima wasi punku trancaspi puñonqanku. Suwintustaj takenqanku chay raqaypa ventanasnimpi trancasnimpiwan.

¹⁵ Chaymin jatunchakoj llajtaqa, paykunallaman confiakuspa kausarqanku, nerqankutaj: Mundontimpi mana waj llajta noqanchej jina atiyniyojqa kanchu. Kunanrí, imaraykutaj ch'impacha, k'ita animalespa puñunankutaj tarikunri? Chayninta pasajkunaqa silbarispa qhesachaspataj qhawarenqanku.