Sofonías 1 - Qheshwa Biblia DC

Señorpa phiñakuynimpa p'unchaynin

¹ Kay willayta Señorqa Sofoniasman apachimorqa, Amospa wawan Josías, rey kashajtin Judapi. Sofoniasqa Cusej wawan karqa, Cusitaj Gedaliaspata, Gedaliasrí Amariaspata, Amariastaj Ezequiaspata.

² Kay jinata Señorqa nin: Jallp'a patapi kashan chayta tukuyninta t'unaykusaj.

³ Runasta animalestawan t'unaykusaj, p'isqosta jinallataj challwastapis. Sajra runasta urmachisaj, jallp'a patapi kaj runasta chinkachisaj. Kay jinata Señorqa nin:

⁴ Judapi tiyakoj runaspa contrampi makiyta churamusaj, Jerusalempi tiyakoj tukuynin runaspa contrampi ima. Chinkachisajtaj kay lugarmanta Baal llulla diosta tukuy laya yupaychana kajta. Sacerdotesnimpa sutisnintawampacha chinkachisaj.

⁵ Wasi patapi kaj patioman wicharispa estrellasta yupaychajkunata t'unaykusaj. Juramentota ruwallankutaj qonqorikuspa chaykunatapis. T'unaykullasajtaj sutiyrayku juramentota ruwaytawan, chay ratopacha Milcom diospa sutinrayku.

⁶ T'unaykullasajtaj noqamanta karunchakojkunata, sutiytataj mana mask'ajkunata, nitaj jamuriwaspa tapurikuwankuchu chaykunata.

⁷ Ch'in kaychej Señorpa ñaupaqempi. Señorpa p'unchaynenqa qayllamushanña! Señor wakichin uj jaywanata, wajyasqasnintataj llimphuchanña!

⁸ Chay rikuchiku jaywana p'unchaypeqa kamachejkunata, kurajkunatawan, reykunaj wawasninkutawan jasut'isaj. Waj llajtamanta kaj p'achaswan p'achallikojkunata jasut'illasajtaj.

⁹ Chay p'unchaypi jasut'illasajtaj wasisman phinkispa yaykojkunata, ch'ajwaywan ch'aukiyasqankuwantaj patronesnimpa wasinman junt'achejkunata.

¹⁰ Señorqa kay jinata nin: Jaqay p'unchaypi runas mañakonqanku yanapariway nispa, chay qhapariytaj challwas punkumantapacha uyarikonqa. Qhepa kaj llajtamantapacha runas qhaparikonqanku, orqosmantapacha jallp'a suchuykuna kanqa jatun sonaywan.

¹¹ Qhapariychej qankuna, Mortero nisqa chaynejpi tiyakojkuna, imaraykuchus qhatunata apaykachajkuna tukuyninku wañuranqanku. Qolqewan qhatuspa purejkunapis tukuyninku t'unasqas kanqanku!

¹² Jaqay p'unchaykunapi uj k'anchanata jap'isaj, Jerusalentataj sumajta qhawaykusaj. Chaypachaqa runasta jasut'isaj pikunachus tiyallanku ñaupa vino jina, chaykunata mana ima llakiyniyoj kashanku chaykunatawan. Paykunaqa sonqonkupi nishanku: Señorqa mana imatapis ruwanqachu. Señorqa allin kajta, nitaj mana allin kajtapis ruwanqachu.

¹³ Chayrayku waqaychasninkuta, suwas qhechonqanku. Wasisninkutaj thuñisqas kanqa. Wasista ruwakonqanku, manataj chay wasispi tiyakonqankuchu. Uvasta plantanqanku, chay uvas sach'aj poqoyninmantataj vinota mana ujyanqankuchu.

¹⁴ Señorpa jatun p'unchaynenqa qayllamushanña! Qayllapiña, usqhayllata chayamushan! Señorpa p'unchaynimpa suyaynenqa sonqo nanachej kanqa: Chay p'unchaypeqa aswan atiyniyoj kajkunapis qhaparikonqanku!

¹⁵ Phiñakuy p'unchay kanqa. Chay p'unchaypitaj kay imas kanqanku: Llakikuy ayqoytaj. Thuñikuy, ch'impacha kaytaj. Tutayay, may laqhayaytaj. Phuyusqa p'unchay, laqha llanthutaj.

¹⁶ Chay p'unchaypi pututu waqanqa. Qhaparisqataj kanqa kallpachasqa llajtaspa contrampi, jatuchaj qhawana torresnimpa contrampitaj.

¹⁷ Señorqa nin: Runasta llakikuyman churasaj. Ciegos jina purenqanku, imaraykuchus noqaj contraypi juchallikorqanku. Yawarnenqa ñut'u jallp'a jina qhallasqa kanqa. Aychantaj wanu jina qollusqa kanqa.

¹⁸ Señorpata phiñakuy p'unchaynimpi runataqa mana salvanqachu qolqen nitaj qorimpis. Señorpa k'ajaj phiñakuynin nina jina tukuy llajtantinta q'olaykonqa. Tukuy jallp'a patapi tiyakojkuna uj ratollapi t'unasqas kanqanku.