Santiago 5 - Qheshwa Biblia DC

Qhapajkunaj contrampi

¹ Kunanqa, qhapajkuna, waqaychej ari, qhapariychej qankunaman llakiykuna jamunanmanta.

² Qhapaj kapuyniykichej ismusqa kashan, p'achasniykichejtaj thutasqa kashan.

³ Qoriykichej, qolqeykichejpis qorwariyasqas kashanku. Chay qorwariyasqastaj qankunaj contraykichejpi kashan, ninawan jinataj ruphaykonqa tukuy aychaykichejta. Qhapaj kayniykichejta tantarqankichej qhepa p'unchaykunapaj.

⁴ Qankunataj mana pagarqankichejchu, chajraykichejpi llank'ajkunaman cosechata oqharispa, ch'aukiyasqas kasqankurayku. Chay cosechata oqharejkunataj qhaparishanku contraykichejpi; chaytaj atiyniyoj Señorpa ningrinman chayan.

⁵ Kay jallp'a patapi qankunaqa sumaj p'achayoj k'ancharishaj kausarqankichej munayniykichejpi, may kusisqas, sonqosniykichejta wirayachispa ñak'ana p'unchaypaj jina.

⁶ Mana juchayoj runasta juchachankichej, wañuchinkichejtaj, manataj payqa jark'akusunkichejchu.

Señorta pacienciawan suyana

⁷ Chayrayku, hermanos, pacienciakuychej Señor jamunankama, qhawaychej imaynatachus chajrapi llank'aj runaqa, pacienciawan suyan jallp'aj poqoyninta, ajinallatataj pacienciawan suyan ñaupaj parasta, qhepa parastapis.

⁸ Ajinata, qankunapis pacienciakuychej. Sonqosniykichejta kallpachaychej. Señorpa jamuynin qayllamushanña.

⁹ Hermanosníy, ama ujkuna ujkunawan quejanakuychejchu juchachasqas kanaykichejpaj; juezqa punkullapiña kashan.

¹⁰ Hermanosníy, profetasmanta yachakuychej, imaynatachus ñak'ariykunawan, pacienciawan ima Señorpa sutimpi parlarqanku chayta.

¹¹ Pacienciakuspa ñak'arejkunataqa, kusikuyniyoj kasqankuta ninchej. Qankuna uyarerqankichej Jobpa paciencianta llakiykunapi imaynatachus Señor paymanta khuyakusqanta.

¹² Hermanosníy, amapuni juraychejchu, ni janaj pacharayku, nitaj kay pacharaykupis, nitaj waj juramentowampis. Maypachachus arí, ninkichej, arí kachun; maypachachus, mana ninkichej, mana kachun, ama juchachasqa kanaykichejpaj.

¹³ Qankunamanta mayqellampis llakisqachu kashan? Diosmanta mañakuchun. Pillapis kusisqachu kashan? Salmosta takichun Diosta yupaychaspa.

¹⁴ Qankuna ukhupi mayqellampis onqosqa kashanman chayqa, iglesiamanta kurajkunata wajyachun Diosmanta mañanankupaj, aceitewantaj jawinankupaj Señorpa sutimpi.

¹⁵ Creespa mañasqanku onqosqata thañichenqa, Señortaj sayarichenqa; juchapi karqa chaypis, juchan pampachasqa kanqa.

¹⁶ Chayrayku, willanakuychej juchasniykichejta purajmanta. Ujkuna ujkunapaj Diosmanta mañakuychej thañisqas kanaykichejpaj; cheqan kaj runaj tukuy sonqo mañakuynenqa, sinch'i atiyniyoj.

¹⁷ Profeta Eliaspis noqanchej jina runa karqa. Payqa tukuy sonqo mañakorqa Diosmanta ama parananta, manataj pararqachu kinsa wata sojta killayojta.

¹⁸ Chantá watejmanta Diosmanta mañakojtin paramorqa, jallp'ataj poqoyninta qorqa.

^19-20 Hermanosníy, pillapis qankunamanta cheqan kajpi kashaspa karunchakunman chayqa, waj hermanotaj payta kutirichimun, yachaychej pichus chay runata pantasqa ñanninmanta kutirichimonqa chayqa, salvanqa chay runata, almanta, ashkha juchastaj pampachasqa kanqa.