Santiago 4 - Qheshwa Biblia DC

Kay mundoj imasninta munakojkuna

¹ Maymantataj jamun ch'ajwas maqanakus ima qankuna ukhupi? Manachu sajrata munasqaykichejrayku? Chay sajra qankuna ukhupi maqanakushan.

² Astawan munapayankichej, manataj jap'inkichejchu. Wañuchinakunkichej, k'ajarinkichejtaj qhawanakuspa, manataj taripayta atinkichejchu. Maqanakunkichej, tinkunkichej, manataj tarinkichejchu, imaraykuchus Diosmanta mana mañakunkichejchu.

³ Mañakunkichej chaypis, mana jap'inkichejchu, imaraykuchus mana allintachu mañakunkichej sajra kusikuykunapi usuchinaykichejpaj.

⁴ Uyariychej, qhenchachakoj runas, manachu yachankichej kay mundowan kausajqa Diospa contran kasqanta? Pillapis kay mundoj kausaqen kayta munan chayqa, Diospa enemigon.

⁵ Yuyankichejchu Escritura qhasita nisqanta? Diosqa Espirituta qowanchej noqanchejpi kausanampaj, munakuywan qhawanawanchejpajtaj.

⁶ Payqa astawan khuyakuwanchej. Chayrayku escrituras nin: Diosqa jatunchakojkunata qhesachan, k'umuykukojkunatataj yanapan.

⁷ Astawan Diosta kasuychej. Supaypa contrampi sayakuychej. Paytaj qankunamanta ayqekonqa.

⁸ Diosman qayllakuychej. Paypis qayllamusonqachej. Juchasapas, makisniykichejta llimphuchakuychej. Qankuna iskay yuyayniyojkunaqa, sonqosniykichejta llimphuchaychej.

⁹ Llakikuychej, jik'un jik'unta waqaychej, asikusqaykichej waqayman tukuchun, kusikuyniykichejtaj phutikuyman tukuchun.

¹⁰ K'umuykukuychej Señorpa ñaupaqempi. Paytaj pataman oqharisonqachej.

Ama hermanoykita juzgaychu

¹¹ Hermanos, ama ima sajrata rimaychejchu ujkuna ujkunapaj. Pichus hermanompaj sajrata rimanman, qhawarantaj chayqa, leypa contranta riman, qhawarantaj. Qampis, leyta qhawaranki chayqa, juez jina kanki, astawanqa chay leyta mana junt'ankichu.

¹² Ujlla leyta qojqa, jueztaj. Payllataj atin salvayta, chinkachiytapis. Qanrí, pitaj kanki wajta qhawaranaykipaj?

Ama alabakuychejchu q'aya ima kananmanta

^13-14 Kunanqa, qankuna ninkichej: Kunanchus q'ayachus risunchej waj llajtaman, chaypitaj uj watata kamusunchej, qhatuspa qolqechamusunchej, nispa; mana yachaspa q'aya imachus kananta. Imataj kausayniykichejri? Cheqamanta urphu jina rikhurimun uj ratullapaj, chantá usqhayta chinkaripun.

¹⁵ Astawanqa qankuna ninaykichej kay jinata: Señor munanqa chayqa, kausasunchej, ruwasunchejtaj kayta, chayri jaqayta.

¹⁶ Chaywampis kunanqa may wapus kankichej alabakuspa. Tukuy chay alabakoyqa mana walejchu, sajramin.

¹⁷ Pichus yachan allinta ruwana kasqanta, yachashaspataj mana ruwanchu chayqa, juchallikun.