Santiago 2 - Qheshwa Biblia DC

Ama runastaqa ajllankichu may kasqankuta

¹ Hermanosníy, feniykichej janaj pachapi kaj Señorninchej Jesucristopi kachun; ama runasta imaynachus kasqankuta qhawaspalla.

² Qhawariychej pi runallapis yaykumunman tantakunaykichej wasiman qori anilloyoj, sumaj p'achayoj, chanta uj wajcha yaykumullanmantaj thanta p'achayoj.

³ Sumaj p'achayoj runataqa allinta qhawawajchej, niwajchejtaj: Kay allinnejpi tiyakuy; wajcha kajtarí niwajchej: Qanqa jaqaynejpi sayakamuy, chayrí kay chakisniynejpi tiyakuy, nispa.

⁴ Manachu chayta ruwaspaqa, qankunapura ajllashankichej? Manachu jueces jina kankichej sajra yuyaykunamantaqa?

⁵ Munasqa hermanosníy, uyariychej kay pachamanta wajchasta. Manachu Dios ajllarqa fepi qhapaj kanankupaj, jap'inankupajtaj reinota chayaqepaj jina, Dios nisqanman jina payta munakojkunaman?

⁶ Qankunaqa wajchata p'enqacherqankichej, manachu qhapajkunaqa atiyninkuwan llank'achisorqachej, llakichisorqachej? Manachu paykunallataj juecespaman qhatatisorqachej?

⁷ Manachu paykunaqa jaqay allin sutipaj sajrata rimanku? Chaykunata qankuna qhaparikorqankichej.

⁸ Cheqamantachus junt'awajchej jatun leypa nisqanta, imaynatachus Escriturapi nin: Runa masiykita munakuy qan kikiykita jina, nispa. Chayta ruwawajchej chayqa, allinta ruwankichej.

⁹ Runasta imaynachus kasqankuta ajllankichej chayqa, juchallinkichej. Diospa leynimpa ñaupaqempitaj juchachasqas kankichej, leyta p'akejkuna jina.

¹⁰ Pillapis tukuynin leyta junt'anman, leypa ujnin kamachiynimpitaj pantanman chayqa, tukuyninmanta juchachasqa rikhurin.

¹¹ Dios nerqa: Ama qhenchachakunkichu. Nillarqataj: Ama wañuchinkichu. Kunanqa qhawariy, qan amapis qhenchachakuychu; chaywampis wañuchiwaj chayqa, leyta p'akinkiña.

¹² Qankunaqa ajinata parlaychej, ajinallatataj ruwaychej, imaraykuchus kacharichej leynejta juzgasqas kankichej.

¹³ Pichus wajkunata mana khuyakunchu chayqa, paypis mana khuyakuywan juzgasqa kanqa. Khuyakuytaj atipan juiciotaqa.

Feqa mana ruwaykunawan wañusqa

¹⁴ Hermanosníy, ima walejtaj kanman sichus pipis ninman feniyoj kani, nispa. Manataj ruwasqasnin kanmanchu chayqa, atinmanchu fenillan salvayta?

^15-16 Sichus uj hermano, chayri hermanapis, mana p'achayoj kankuman, sapa p'unchaytaj mikhunamanta pisichikunkuman; qankunamanta ujniykichejtaj ninman: Walejlla risuchun, chirimanta q'oñikamuy, sajsakamuytaj, nispa; manataj imatapis qospa ima allintataj ruwanqa?

¹⁷ Ajina ari fewanqa. Pichus mana rikuchinmanchu ruwasqasninta chayqa, feqa wañusqa pay kikimpi.

¹⁸ Chaywampis pipis ninman: Qan feniyoj kanki, noqajtataj ruwasqasniy kapuwan. Rikuchiway feniykita mana ruwasqaswan, noqataj rikuchisqayki feniyta ruwasqasniywan.

¹⁹ Qan creenki chayqa Diosqa ujlla kasqanta, allinta ruwanki. Jinallatataj supaykunapis creenkoqa, kharkatitinkutaj.

²⁰ Mana yuyayniyoj runa, munankichu yachayta feqa mana ima ruwayniyoj wañusqa kasqanta?

²¹ Manachu Abraham tatanchejqa cheqan runa jina rejsisqa karqa ruwasqasninrayku, maypachachus wawan Isaacta jaywarqa altar patapi, chaypacha?

²² Rikunki jina, Abrahampa fenenqa ruwasqanwan khuska rikuchikorqa. Chaywantaj fenin junt'asqa karqa.

²³ Ajinapi junt'akorqa Escrituraj nisqan: Abraham creerqa Diospi. Chayraykutaj cheqan runapaj qhawasqa karqa, Diospa kausaqen nisqataj karqa.

²⁴ Rikusqaykichej jina, runaqa cheqampaj qhawasqa kanqa ruwasqasninrayku, mana feraykullachu.

²⁵ Ajinallatataj, manachu Rahab qhenchachakoj warmipis cheqampaj qhawasqa karqa allinta ruwasqanrayku, kachasta wasinman wajyarisqanrayku, yanapasqanraykutaj waj ñannejta ripunankupaj?

²⁶ Imaynatachus cuerpoqa mana espirituyoj wañusqa kashan, ajinallatataj fepis mana ima ruwasqasniyojqa wañusqa kashan.