Salmos 99 - Qheshwa Biblia DC

Señorqa jatun reymin

¹ Señorqa kamachishan; tukuy runas kharkatenqanku, paypa tiyananqa querubinespa patampi kashan, jallp'apis kharkatenqa.

² Señorqa Sión orqopi jatunmin. Señorqa tukuy llajtasmanta aswan patapi kashan.

³ Jatun manchana sutiykeqa yupaychasqa kachun. Diosninchejqa santomin.

⁴ Qan atiyniyoj rey kanki, cheqan kaj ruwayta munanki, qan kikiyki cheqan kajta sayacherqanki. Cheqa kajta, cheqan kajtataj, Jacobpa miraynimpi ruwarqanki.

⁵ Jatunchaychej Señor Diosninchejta. Tiyanampi tiyashajtin ñaupaqenman k'umuykukuychej. Diosninchejqa santomin.

⁶ Moiseswan, Aaronwampis sacerdotesninmanta kanku; Samuelpis Diospa sutinta wajyakojkunamanta kashan. Paykuna Señorta wajyakoj kanku, paytaj uyarej.

⁷ Paykunawan Dios parlarqa sayt'u sayaj phuyu ukhumanta; nisqanta paykunaqa junt'arqanku, tukuy chay kamachisqasnintawan.

⁸ Señor Diosniyku, qan paykunaman kuticherqanki, qan paykunaj juchasninkuta pampacharqanki. Juchallikojtinkutaj jasut'erqanki.

⁹ Señor Diosninchejta jatunchaychej, ajllakusqan orqompi k'umuykukuychej. Señor Diosninchejqa llimphumin!