Salmos 98 - Qheshwa Biblia DC

Diospa cheqan kayninman yupaychana

¹ Uj mosoj takiyta Señorman takiychej, may t'ukunasta pay ruwasqanrayku. Payqa atiyninwan tukuyta atipan; santo makinwan.

² Señorqa atipananta willarqa, cheqan kaynintataj rikucherqa, tukuy runas rikushajtin.

³ Payqa Israel ayllunrayku munakuyninta, cheqa kaynintawan mana qonqanchu. Kay pachapi kaj chhika runakuna, Diosninchejpa atipasqanta rikunku.

⁴ Diosninchejman kusisqas takiychej, kay pachapi kaj chhika runas. Tukuy sonqo kusikuywan Señorman takiychej, takiykunatataj takiychej.

⁵ Takiykunata Señorman takiychej arpaj waqaynimpi, charangoj waqaynimpi, guitarraj waqaynimpi ima.

⁶ Señor reypa ñaupaqempi kusisqas takiychej, qenaj waqaynimpi, pututuspa waqaynimpi ima.

⁷ Mar qocha qhaparichun, tukuy ima chaypi kajpis. Kay pachapis qhaparichun, tukuy chaypi tiyakojkunapis.

⁸ Mayus t'ajllakuchunku, orqokunapis uj similla kusikuywan qhaparichunku,

⁹ Señorpa ñaupaqempi. Payqa jamushan kay pachata kamachej. Pay kamachenqa kay pachapi llajtasta, cheqan kaywan mana pantaspa.