Salmos 97 - Qheshwa Biblia DC

Señorqa reymin

¹ Tukuy jallp'a kusikuchun, mar qocha chaupipipis khurus kusikuchunku. Señorqa reymin!

² Sinch'i yanayarishaj phuyus chaupipi kashan; cheqa kajwan, maychus kajwantaj tiyananta sayachin.

³ Ninaqa ñaupaqenta renqa, muyuynimpi kaj enemigosnintataj q'olaykonqa.

⁴ Lliuj lliujkunasnintaj kay pachata k'anchaykun, jallp'ataj chayta rikuspa kharkatin.

⁵ Orqosqa wila wira jina unayanku Señorpa ñaupaqempeqa. Paymin dueño tukuy jallp'amanta.

⁶ Janaj pachapeqa cheqan kayninta willashan; tukuy runastaj atiyninta rikunku.

⁷ K'umuykachachunku dios nispa rumisllata yupaychajkunaqa. Chay ruwasqankumanta wapu wapu sayaykojkuna; tukuy dioskunataj ñaupaqenman qonqorikuchunku.

⁸ Señorníy, Sionqa, Judapis, llajtaspis, kamachisqasniykimanta anchatapuni kusikunku.

⁹ Qanlla Señor, kay pachapeqa tukuy imamanta aswan patapi kanki, tukuy dioskunamanta aswan patapi.

¹⁰ Señorqa sajrata chejnikojkunata munakun. Payman t'aqasqakunaj kausayninkuta waqaychan, sajrakunaj makisninman urmanankumantapis libran.

¹¹ Cheqan k'acha runapaj k'anchay lliphipin. Kusikuytaj cheqan sonqoyoj runapaj.

¹² Cheqan k'acha runas, Señorwan kusikuychej, santo sutintataj yupaychaychej.