Salmos 96 - Qheshwa Biblia DC

Señorta yupaychanapaj mosoj takiy

¹ Uj mosoj takiyta Señorman takiychej, Señorman kay pachapi tukuy tiyakojkuna takiychej:

² Señorman takiychej, sutintataj yupaychaychej, sapa día willaychej salvakusqanchejmanta.

³ Jatun kayninmanta tukuy runasman willaychej. Chay sumaj ruwasqasninmantataj, tukuy ayllusman parlaychej.

⁴ Diosqa may jatunmin, yupaychanapaj jinapuni, tukuy dioskunamanta nisqaqa, aswan manchachikuna.

⁵ Waj aylluspa diosninkunaqa mana kaj lantislla kanku. Señortaj janaj pachata ruwarqa.

⁶ Ñaupaqempeqa jatun kaynin lliphipishan. Yupaychana wasimpitaj atiywan k'acha kaywan tiyan.

⁷ Tukuy ayllusmanta llajtas Señorta yupaychaychej, jatunchaychejtaj.

⁸ Señorpa sutinta yupaychaychej, pationmantaj jaywanasta aparisqa yaykuychej.

⁹ Señorta yupaychaychej k'acha patiompi, ñaupaqempitaj tukuy runas kharkatichunku.

¹⁰ Diosta mana yupaychaj runasman niychej: Señorqa rey; pay kay pachata sinch'ita sayacherqa, mana kuyunampaj jina. Payqa tukuy runasta kamachin uj rejllatapuni, nispa.

¹¹ Kusikuchunku janaj pacha, kay pachapis, mar qochapis sonarichun, tukuy chaypi kajkunapis.

¹² Kusikuchunku tukuy jallp'as, tukuy ima chaypi kajpis, monte sach'aspis kusikuywan qhaparichunku.

¹³ Kusikuchunku Señorpa ñaupaqempi, imaraykuchus pay jamushan. Pay jamushan ari kay jallp'ata kamachej. Kay pachapi tukuy runasta kamachenqa cheqan kajwan, cheqa kajwantaj.