Salmos 95 - Qheshwa Biblia DC

Kusiywan Señorta yupaychana

¹ Jamuychej Señorman; kusiywan takisunchej; takisunchej jark'aj salvawajninchejman.

² Ñaupaqenman agradecekuspa yaykunachej, takinataj payta yupaychaspa,

³ imaraykuchus Señorqa jatun Diosmin, tukuy dioskunaj jatun reyninkutaj.

⁴ Paypa makimpi kanku; jallp'aj ukhumpis, aswan alto orqospis paypata kanku.

⁵ Paypata mar qochapis, pay ruwasqanrayku. Ch'aki jallp'apis paypallatataj, makisninwan ruwasqanrayku.

⁶ Jamuychej; qonqorisqas yupaychanachej. Qonqorikunachej Señorpa ñaupaqempi, imaraykuchus pay ruwawarqanchej.

⁷ Pay Diosninchej, noqanchejrí ayllun kanchej, q'omer pampakunapi kaj ovejasnin. Uyariychej kunan paypa nisqanta:

⁸ Ama Meribapi jinaqa sonqoykichejta rumiyachiychejchu, chay p'unchaypi jina, Masahpi, chay ch'in pampapi.

⁹ Chaypachachus ñaupa tatasniykichej, pruebaman churawarqanku ruwasqasniyta rikushaspapis.

¹⁰ Tawa chunka watasta chay runa mitawan phiñasqa karqani. Nerqanitaj: Kay runasqa mana allintachu purinku, manataj kamachisqasniytapis kasuwankuchu.

¹¹ Chayrayku sinch'i phiñakuyniypi jurarqani, samarinayman mana yaykonqankuchu, nispa.