Salmos 94 - Qheshwa Biblia DC

Señorqa kay pachata cheqanchajmin

¹ Señor Dios, vengakoj Dios kasqaykita rejsichikuy.

² Wapuchakojkunaj contrampi oqharikuy, ruwasqankuman jinataj kutichiy. Qanmin kay pachata cheqanchajqa kanki.

³ Jayk'ajkamataj Señor, jayk'ajkamataj sajra kayniyoj runas kusikonqankuri?

⁴ Chay sajrata ruwajkuna, wapu wapus mana kasukoj kanku, mana kaj ch'ajollislla kanku.

⁵ Señorníy, aylluykita sarunku, runasniykita llakichinku.

⁶ Viudasta, waj llajtayojkunatawan wañuchinku, mana tatayoj, mana mamayojkunantinta wañuchinku.

⁷ Paykunaqa ninku: Señor mana rikunchu, Jacobpa Diosnin mana reparanchu, nispa.

⁸ Unanchaychej wampu runas, jayk'ajkamataj yuyayniykichejman mana kutirinkichejchuri?

⁹ Manachu uyarinman ningrista ruwajqa? Manachu ñawista ruwajqa rikunman?

¹⁰ Tukuy runasta jasut'ejqa manachu k'aminman? Runaman tukuy imata yachachejqa?

¹¹ Señorqa yachan runaj yuyaynenqa, qhasi manakajlla kasqanta.

¹² Señorníy, kusikuyniyojmin cheqanchasqayki runaqa, pimanchus kamachiyniykita yachachinki chayqa.

¹³ Sajra p'unchaykuna chayamojtin, tiyasqa sonqo kanampaj. Chaykamataj sajra runapajqa uj jusk'u allakushan.

¹⁴ Señorqa mana ayllunta saqenqachu, nitaj wawasnintapis qonqanqachu.

¹⁵ Justiciaqa watejmanta cheqan kanqa, cheqan sonqoyoj runataj qhatenqa.

¹⁶ Pitaj sayarimuspa jark'akuwanqari, chay sajra millay runasmantari?

¹⁷ Manachus Señor yanapawanman chayqa, wañusqakunaj ch'in tiyanankupiwan kayman karqa.

¹⁸ Señorníy, noqa nerqani: Chakisniy llusp'ichin nishajtiy, qampa munakuyniyki yanapawan.

¹⁹ Sonqoy ukhupi ashkha llakiyniyoj kashajtiy, sonqochawanki, kusichiwankitaj.

²⁰ Qanqa mana sajra juezkunaj masinchu kanki, mayqenkunachus leypa contranta sajrata ruwanku.

²¹ Mana juchayoj runaj contrampi wakichikunku, wañuchinankupajtaj juchachanku.

²² Señortaj noqaj pakakunay, Diosniymin pakawajniy chhankaqa.

²³ Señorqa sajra ruwajkunata kikin ruwasqallankuwantaj chinkachenqa. Señor Diosninchej paykunata chinkachenqa.