Salmos 92 - Qheshwa Biblia DC

Diospa khuyakuyninmanta takina

¹ Patapi kaj Señorníy, ancha sumajpuni qanman graciasta qonaykoqa, takipusunaykutaj, qanta yupaychaspa.

² Tutamanta khuyakuyniykimanta willaraspa, ch'isisnintaj cheqa kayniykimanta.

³ Charangospa, guitarraspa waqaynimpi, arpaj k'acha waqayninwan ima.

⁴ Señor, ruwasqasniykiwan kusichiwanki, makisniykej ruwasqasnenqa kusichiwanku.

⁵ Señorníy, may jatunmin ruwasqasniykeqa, yuyasqasniykita mana unanchay atina jina.

⁶ Wampu runaqa mana yachanchu, mana yuyayniyoj runataj mana unanchanchu.

⁷ Sajra runasqa qhora jina wiñanku. Tukuy sajrata ruwajkunataj t'ika jina phancharinku, ruthuspa, wiñaypaj chinkarisqas kanallankupaj.

⁸ Qantaj Señor wiñaypaj may jatun kanki.

⁹ Cheqapuni kayqa: Enemigosniyki t'unasqas kanqanku, Señor; tukuy sajra ruwajkunapis ch'eqerasqas kanqanku.

¹⁰ Qan kallpata yapawanki, toroj kallpanman jina, umaymantaj k'acha q'apayniyoj aceitewan jawiwanki.

¹¹ Enemigosniyta urmashajta rikusaj, contraypi jatarejkunaj qhaparisqankutataj uyarisaj.

¹² Cheqan runasqa palma jina t'ikanqanku, Líbano cedro sach'as jinataj wiñanqanku.

¹³ Señorpa wasimpi plantasqas kashanku; Diosninchejpa patiosnimpi t'ikanqanku.

¹⁴ Machu kayninkupipis poqollanqankupuni; sinch'itaj, q'omerllapunitaj kanqanku.

¹⁵ Chaytaj sut'inchawanqa: Jark'awajniy Señorqa cheqan kasqanta.