Salmos 91 - Qheshwa Biblia DC

Señormin jark'akuwajninchej

¹ Patapi kaj Diospa jark'asqan kausakojqa, Tukuy Atiyniyoj Diospa llanthumpi pakakojqa.

² Señorman nin: Qan kanki pakakunay, jatun wasiy, Diosniytaj, qampi suyakusaj.

³ Paylla librasuyta atisunki, tukuy pakasqa tojllasmanta, wañuchej onqoykunamantawan.

⁴ Lijrasninwan qhataykusonqa; chay urapi sumaj pakasqa kanki, cheqa kaynintaj jark'asonqa.

⁵ Ama tutapi manchachikunasmanta manchachikuychu, nitaj p'unchaypi kacharimusqa flechastapis.

⁶ Nitaj laqhawan chayamoj onqoymantapis, nitaj chaupi p'unchaypi tukuchej onqoymantapis.

⁷ Waranqa wañusqas urmanqanku lloq'e ladoykiman, chunka waranqataj paña ladoykiman. Chaywampis, qantaqa mana imanasonqachu.

⁸ Cheqamanta chaykunataqa qhawallanki. Rikunkichej sajra runas ruwasqankuman jina, payta jap'ejta.

⁹ Señorpi atienekusqaykirayku, jatun Diosta jark'akunaykipaj churakusqaykirayku,

¹⁰ mana ima sajra kajpis wasiykiman chayamusonqachu, nitaj onqoypis wasiykiman yaykumusonqachu.

¹¹ Pay angelesninta kamachenqa, maymampis rejtiyki qhawasunankupaj.

¹² Makisninkupi apasonqanku, ama ima rumipipis misk'akunaykipaj.

¹³ Katarej patantapis purinki. León uñata, dragontapis sarunki.

¹⁴ Pay munakuwan; noqa payta salvasaj, patamantaj oqharisaj sutiyta rejsichisqanrayku.

¹⁵ Pay wajyawajtin, noqa uyarisaj, noqapuni paywan kasaj; llakiypipis noqa paywan kasaj. Libraspataj allinman payta churasaj.

¹⁶ Ashkha watasta payta kamachisaj, salvacionniytataj payman qosaj.