Salmos 9 - Qheshwa Biblia DC

Diospa cheqan kayninmanta yupaychana

¹ Señorníy, tukuy sonqoywan yupaychasqayki, chhika k'acha ruwasqasniykimantataj willamusaj.

² Jatun Diosníy, qampi kusikusaj, sonqo junt'asqataj sutiykiman takisaj.

³ Ñaupaqeykimanta enemigosniy ayqenku, urmanku, wañunkutaj.

⁴ Qanqa cheqan Juezmin kanki, tiyanaykipitaj tiyaykorqanki justiciata ruwapunawaykipaj.

⁵ Diospi mana creejkunata k'amerqanki, sajrakunata chinkacherqanki, qonqaymantaj paykunata wiñaypaj wiñaynimpaj churarqanki.

⁶ Enemigoqa wañupun; chay llajtasnintapis urmacherqanki, chinkacherqankitaj manaña jayk'ajpis yuyarikunapaj jina.

⁷ Señorqa wiñaypa wiñaynimpajmin. Payqa tiyanata sinch'ita sayacherqa juzganampaj.

⁸ Cheqan sonqo mundontinta juzganqa. Pay runasta cheqanta juzganqa.

⁹ Señorqa runaspa llakichisqasninmanta jark'akun; phutiywan atipachikushajtinkupis yanapan.

¹⁰ Rejsisojkunaqa, Señor qampi atienekusunku imaraykuchus mask'asojkunataqa ni jayk'aj qonqankichu.

¹¹ Siompi tiyakoj Señorman takiychej. Tukuy runasman ruwasqasninta willamuychej.

¹² Diosqa llakichisqakunamanta yuyarikun; waqayninkuta mana qonqanchu. Paykunata llakichejkunatataj jasut'in.

¹³ Señor, noqamanta khuyakuway. Qhaway imaynatachus chejnikuwajkuna llakichiwasqankuta. Wañuy patamanta orqhoway.

¹⁴ Jinata, Jerusalén punkupi mundontinman nisaj, qan yupaychanapaj jina kasqaykita, salvawasqaykimanta kusisqa kasqaymantataj willasaj.

¹⁵ Diospi mana creejkunaqa jusk'u allasqallankupitaj urmanku. Ch'ipasta pakasqallankupitaj chakisninkupis jap'ichikunku.

¹⁶ Señorqa runaswan rejsichikun, cheqanta ruwaspa. Sajra runataj kikin ch'ipa ruwasqallanwantaj ch'ipaykuchikun.

¹⁷ Sajra runaswan Diospi mana creejkunawan, wañusqaspaman riponqanku, Diosmanta qonqapusqankurayku.

¹⁸ Wajchasrí manapuni qonqasqaschu kanqanku. Suyasqankupis manapuni chinkanmanchu.

¹⁹ Sayarikuy, Señor, ama munaychu runa wapu wapu sayaykunanta. Mana qampi creejkunata ñaupaqeykipi juzgay.

²⁰ Manchachikuyta qoy paykunaman Señor, yachachiy runaslla kasqankuta.