Salmos 86 - Qheshwa Biblia DC

Qanlla Diosqa kanki

¹ Señorníy, uyarillaway, imaraykuchus ancha llakisqa, wajchataj kani.

² Jark'away, imaraykuchus qanllata qhatikuyki. Qan Diosniy kanki; Qampi atienekoj kamachiykita salvaway ari.

³ Señor, khuyakuy noqamanta, qanta tukuy p'unchay wajyakuyki.

⁴ Señor, kusichiy kay kamachiykej sonqonta, imaraykuchus qanman sonqoyta oqharini.

⁵ Qanqa k'acha kanki, perdonankitaj, qanta wajyakojkunapaj jatun munakuyniyoj kanki.

⁶ Señor, uyariy mañakusqasuyta; mañakusqaytaqa uyarillaway.

⁷ Llakiyniypeqa qanta qhaparikuyki, qantaj uyariwanki.

⁸ Señor, qan jina Diosqa mana kanchu, ruwasqasniyki jinaqa mana kanchu.

⁹ Señor, tukuy nacionesta qan sayachinki, tukuyninkutaj qanta yupaychasonqanku, sutiykitataj jatunchanqanku.

¹⁰ Qanlla Dios kanki. Jatun kanki, may t'ukuna imastataj ruwanki.

¹¹ Señor ñanniykita yachachiway. Noqa chaynillantapuni purinaypaj, sonqoytaj sutiykita waqaychan.

¹² Señor Diosníy, tukuy sonqoywan yupaychasqayki, jatun sutiykitataj oqharisajpuni.

¹³ Munakuyniykeqa noqapaj jatun, salvawanki sepulturaman urmanaymanta.

¹⁴ Diosníy, may kasqankuta yuyakojkunaqa contraypi oqharikuspa wañuchiyta munawanku; mana qanmanta yuyarikunkuchu.

¹⁵ Qanrí, Señor, llamp'u sonqoyoj Dios kanki, pacienciayoj, jatun munakuyniyoj, cheqantaj.

¹⁶ Qhawariway, noqamanta khuyakuway, kallpachaway, salvawaytaj kay kamachiykita.

¹⁷ Noqawan k'acha kasqaykita sut'inchaway. Chayta rikuspataj, p'enqachikuchunku chejnikuwajkunaqa. Qan, Señor, sonqochawanki, yanapawankitaj.