Salmos 84 - Qheshwa Biblia DC

Diospa wasimpi kayta munana

¹ Manchay k'achitu tiyakuna wasiykeqa, Tukuy Atiyniyoj Señorníy.

² May jinatapuni munani usqhayllata wasiykej patiosnimpi kayta; tukuy sonqoywan, tukuy aychaywan, kausayta qoj Diosman takini.

³ Phichitankaspis, para p'isqospis, altaresniykipi tiyakunankupaj wasita tarinku, chaypi irpitasninkupaj thapachakunankupaj. Tukuy Atiyniyoj Señor, Reyníy, Diosniytaj.

⁴ Kusisqas kanku wasiykipi kausakojkunaqa. Paykunaqa mana samarispa yupaychasonqanku.

⁵ Kusisqas kanku qampi yanapata tarejkunaqa, pikunachus orqoykikama chayayta munanku chaykuna.

⁶ Waqay llakiy valleta pasashaspa, yaku juturiman tukuchenqanku, parataj tukuy allinkunawan junt'achenqa.

⁷ Paykunaj kallpankoqa yapakonqa, Siompitaj jatun Diosta rikonqanku.

⁸ Janaj pacha Tukuy Atiyniyoj Señor, Jacobpa Diosnin, uyariy mañakususqayta.

⁹ Diosníy, jark'awajniyku, allin ñawiwan qhaway qampaj ajllakusqaykita rey kanampaj.

¹⁰ Aswan sumaj uj p'unchay patiosniykipi kayqa, waranqa p'unchaykunata karupi kajmantaqa. Astawanqa munayman Diospa wasinta qhawaspa tiyakuyta sajra cheqaspi tiyakunaymantaqa.

¹¹ Señor Diosqa k'anchawanchej, waqaychawanchejtaj. Señorqa munakun qhawantaj llimphu sonqo kausakojkunata tukuy ima allintataj paykunaman qollampuni.

¹² Tukuy Atiyniyoj Señor, may kusisqas kanku qampi atienekojkunaqa.