Salmos 82 - Qheshwa Biblia DC

Aswan jatun cheqanchajqa Diosmin

¹ Diosninchej dioskunaj tantakuyninkupi kashan, paykunata juchachanampaj.

² Jayk'ajkamataj qankunaqa, cheqan kajman jina mana cheqanchankichejchu, sajra kajkunamantaj kutikunkichejri?

³ Justiciata ruwaychej pisi kallpayojkunaman, wajchasman ima. Justiciata ruwaychej llakisqasman, mana kallpayojkunamampis.

⁴ Libraychej pisi kallpayojkunata. Mana kapuyniyojtapis libraychej, sajra runasmantataj jark'aychej.

⁵ Qankunaqa mana yachankichejchu, nitaj manchankichejchu; laqhapi purishankichej. Kay jallp'aj cimientosnintaj kharkatinku.

⁶ Noqa nerqani qankunaqa dioskuna kasqaykichejta; tukuytaj jatun Diospa wawasnin kasqaykichejta.

⁷ Chaywampis, tukuy runa jinalla wañunkichej; tukuy sajra kamachej jinallataj wañunkichej.

⁸ Sayarikuy, Diosníy, kay jallp'ata cheqanchay. Tukuy nacionesta jap'ikapunayki tiyan.