Salmos 81 - Qheshwa Biblia DC

Diospa k'acha kaynin, Israelpa sajra kaynin

¹ Kusikuywan Diosman takiychej, payqa kallpanchej; Kusikuywan qhaparispa Jacobpa Diosninta jatunchaychej.

² Takiychej tamborwan, arpawan, charangoj misk'i waqayninwan ima.

³ Putututa waqachiychej mosoj killa chayamojtin, jinallatajpura kajtimpis, chay diaqa jatun p'unchayninchej.

⁴ Kay kamachiytaqa Jacobpa Diosnin Israelman qorqa.

⁵ Chaytataj Diosninchej Joseman qosqa Egiptomanta orqhomushaspa. Uj mana rejsisqa parlayta uyarerqani.

⁶ Wasaykimanta q'epita qhechorqayki, sinch'i llank'aymanta orqhorqayki.

⁷ Llakiyniykipi wajyawarqanki, noqataj librarqayki, qhon qhon phuyu ukhumanta kutichimorqayki. Meriba yaku chimpapi probarqayki.

⁸ Uyariy, ayllúy, kay k'amisusqayta, Israel, allin kanman kasunawaykeqa.

⁹ Ama waj dioskunayojqa kaychejchu. Ama waj dioskunataqa yupaychaychejchu.

¹⁰ Noqa Señor Diosniykichej kani. Noqa orqhorqaykichej Egipto jallp'amanta. Simiykita kichariy, noqataj, munayniykita junt'asaj.

¹¹ Aylluy mana uyariwarqachu; Israelqa mana kasukuwarqachu.

¹² Chayrayku munasqampi saqerqani; yuyasqankuman jinataj kausarqanku.

¹³ Aylluychus uyarinman karqa chayqa, Israeltajchus ñankunasniyta qhatinman karqa chayqa.

¹⁴ Uj ratollapi noqaqa, enemigosninta urmachiyman karqa, jasut'iymantaj karqa llakichejkunata.

¹⁵ Señorta chejnikojkunaqa ñaupaqenman mancharisqas urmankuman. Juchachasqa kasqankutaj mana tukukuyniyoj kanman.

¹⁶ Diostaj aswan sumaj trigota ayllunman mikhuchinman. Rumimanta orqhosqa misk'itaj sajsachinman.