Salmos 8 - Qheshwa Biblia DC

Señorpa sutenqa jatun

¹ Señor Diosniyku, sutiykeqa may jatun tukuy kay pachapi. K'anchayniykitataj janaj pacha patapi churarqanki.

² Juch'uy wawas ñuñojkunapis atiyniykita qhaparinku. Chay qhaparisqaykutawanqa, qan enemigosniykoj ñaupaqempi jark'anata sayachinki, chejnisojkunata, contraykipi oqharikojkunatawan ch'inyachinaykipaj.

³ Qampa ruwasqayki cielota qhawaspa, killata ch'askastawan, chayri churasqaykita, noqa nini:

⁴ Imataj runari paymanta yuyarikunaykipajri? Imataj runa payta qhawanaykipajri?

⁵ Yaqhapuni angelesta jina ruwarqanki. Paytataj atiyniyojta, allimpaj qhawanata churarqanki.

⁶ Makiykej ruwasqasninta kamachinampaj churarqanki, tukuy imastataj makisninman jaywarqanki:

⁷ Ovejasta, bueyesta, k'ita animalesta,

⁸ phawajkunata, mar qochapi challwasta, mar qochapi tukuy kausashajkunatawan.

⁹ Señor Diosniyku, sutiykeqa may jatun tukuy kay pachapi. K'anchayniykitataj janaj pacha patapi churarqanki.