Salmos 79 - Qheshwa Biblia DC

Jerusalén thuñikusqanmanta llakiy

¹ Diosníy, waj naciones jallp'asniykiman yaykuykamunku. Llimphu wasiykita ch'ichichanku. Jerusalentataj raqayman tukuchinku.

² Llimphu kamachisniykej ayasninta suweq'arasman, phiña animalesman ima qaraykorqanku.

³ Yakuta jina yawarninkuta jich'anku tukuy Jerusalempi, manataj pi p'ampaykoj karqachu.

⁴ Qayllaykupi kajkunaj asipayanan kayku, muyuyniykupi kajkunaj asikunantaj.

⁵ Señorníy, mayk'ajkamataj phiñasqa kankiri? Phiñakuyniykeqa nina jinallapunichu lauranqa?

⁶ Mana rejsisojkunaj nacionespa patanman phiñakuyniykita chayachiy. Sutiykita mana oqharej nacionespa patanman ima.

⁷ Paykuna Jacobta tukucherqanku, tukuy llajtataj ch'inman tukucherqanku.

⁸ Ama noqaykutaqa pagachiwaykuchu, ñaupa tatasniykoj sajra ruwasqasninkumantaqa; khuyakuyniyki usqhayllata noqaykupaj jamuchun, imaraykuchus ancha llakisqas kashayku.

⁹ Salvawajniyku Dios, yanapawayku, librawayku, juchasniykutataj pampachawayku sutiyki jatun kasqanrayku.

¹⁰ Qanta mana qhatisojkuna nenqanku: Maypitaj Diosninku kashan?, nispa. Kamachisniykej wañuyninmanta ayni kutichisqata rikuchiwayku, Qanta mana qhatisojkunapis yachanankupaj.

¹¹ Uyariy presochasqa runas waqaspa wañurasqankuta. poqoynintaj Eufrates mayukama.

¹² Señorníy, qayllaykupi kajkunaman, qanchis kutita aynita kutichiy, contraykipi millayta juchallikusqankumanta.

¹³ Noqaykurí aylluyki kayku, q'omer pampasniykimanta ovejasniyki. Graciasta qollasqaykupuni. Takisqaykutaj qanta yupaychaspa, wiñaypa wiñaynimpaj.