Salmos 78 - Qheshwa Biblia DC

Ayllunrayku Diospa cheqan ruwasqasnin

¹ Ayllúy, yachachisqasuyta uyariy. K'umuykuspa nisqasuyta uyariy.

² Imasmari palabraswan sut'inchasaj, unay ñaupa tiempomantapacha, kunankama pakasqa kajkunata:

³ Imatachus uyarisqanchejta, tatanchejpa willawasqanchejtapis.

⁴ Mana pakaspa wawasninchejman willasunchej. Qhepa runa mitaswan Señorta yupaychasunchej. Parlasuntaj atiyninmanta, sumaj ruwasqasninmantawan.

⁵ Diosninchej leyta Jacobpaj churarqa, chayman jina Israelpi purinankupaj, kamacherqataj ñaupa tatasninchejman, mirayninkuman yachachinankuta;

⁶ qhepa mita runas yachanankupaj, nacekunanku karqa chay wawas, chayman jinataj paykunapis wawasninkuman yachachinankupaj;

⁷ Diospi atienekunankupaj, paypa ruwasqanta ama qonqanankupaj, kamachisqasninta junt'anankupaj;

⁸ amataj ñaupa tatasninku jina kanankupaj: Wampus, Diospa contranta oqharikojkuna, sonqonkupitaj iskayta yuyajkuna, Diosta mana kasukoj runa mitas.

⁹ Efraín ayllumanta kajkuna, mayqenkunachus sumaj wakichisqas karqanku, arcoswan flechaswan ima, wasancharqanku maqanakuna p'unchaypi.

¹⁰ Dioswan trato ruwasqankuta mana waqaycharqankuchu, nitaj yachachisqasnintapis junt'ayta munarqankuchu.

¹¹ Astawanqa Diospa ruwasqasninmanta qonqaporqanku, chay sumajkunata rikuchisqasninmantawan.

¹² Diosqa tatasninkoj ñaupaqempi sumajkunata ruwarqa, Egiptopi jallp'api kaj Zoán cheqapi.

¹³ Mar qochata iskayman khallarqa, chaynintataj chimpaman chimpacherqa, uj perqata jina yakuta sayachispa.

¹⁴ P'unchaypeqa phuyuwan pusarqa, tutantaj nina k'anchaywan.

¹⁵ Ch'in pampapitaj rumi orqota iskayman ch'ejtarqa, chaymanta ashkha yakuta ujyanankupaj qorqa.

¹⁶ Rumi orqomanta yakuta llojsichimorqa, sinch'i mayu jina kanankamapuni.

¹⁷ Chaywampis, paykunaqa juchallikullarqankupuni, patapi kaj Diospa contrampi oqharikorqanku chay ch'in pampapi.

¹⁸ Diosta sonqonkupi tentarqanku, munayninkuman jina mikhunata mañaspa.

¹⁹ Paypaj parlarqanku, nispa: Atinmanchu Diosqa ch'in pampapi mikhunata qoyta?

²⁰ Cheqapuni Diosqa rumi orqota ch'ejtarqa, chaymantataj yaku llojserqa mayu jinapuni, jallp'ataj llump'iykorqa. Ayllunman atinmanchu qoyta t'antata, aychata?

²¹ Chayta uyarispa Señorqa phiñakorqa, chay phiñakuynintaj nina jinapuni, Jacobpa contrampi jap'iykukorqa.

²² Diospa mana atienekorqankuchoqa, nitaj yanapaynimpipis creerqankuchoqa.

²³ Chaywampis, Dios phuyusta kamacherqa, cielo punkustataj kicharerqa.

²⁴ Ayllun pataman paracherqa Maná nisqata, cielomanta trigota mikhunankupaj.

²⁵ Runaqa angelespa t'antankuta mikhorqa. Diosninchej ashkha mikhunata qorqa.

²⁶ Inti llojsimuynejmanta, uraynejmantawan wayrachimorqa, Diosninchej atiyninwan chayachimorqa.

²⁷ Aychata ayllumpaj parachimorqa. p'isaqastapis mar t'iyuta jinapuni.

²⁸ Diosninchej urmacherqa maypichus karqanku chayman, toldosninkoj muyuyninman.

²⁹ Mikhorqankutaj sajsakunankukama. Ajinata Diosninchej munasqankuta junt'arqa.

³⁰ Manaraj yarqhayninkumanta sajsakushajtinku, mikhuypis simillankupiraj kashajtin,

³¹ Diospa phiñakuynin paykunaman chayarqa; wañucherqataj aswan kallpayoj runasta, Israelmanta aswan sumaj runasta.

³² Chaywampis, watejmanta juchallikullarqankutaj, Diospa sumaj ruwasqasnimpi mana creerqankuchu.

³³ Chayrayku, Dios paykunata mana kajman tukucherqa, jatun llakiy chaupipi.

³⁴ Dios wañuchejtin chaypacharaj mask'aj kanku, payman kutirispa mana samarispa mask'aj kanku.

³⁵ Chaypachataj patapi kaj Diosmanta yuyarikorqanku, Pay pakakunanku, salvajninkutaj kasqanta.

³⁶ Qallunkuwan, siminkuwantaj, k'acha llullakuykunasta nej kanku.

³⁷ Ni jayk'ajpis cheqan sonqoschu karqanku, nitaj junt'arqankuchu trato ruwasqankutapis.

³⁸ Diostaj paykunamanta khuyakoj, sajra kayninkuta pampachaj paykunata mana tukuchispa; ashkha kuti ithiricherqa phiñakuyninta, manataj phiñakuywan atipachikorqachu.

³⁹ Diosqa yuyarikorqa runalla kasqankuta, wayra jina ripoj mana kutimoj.

⁴⁰ Mashkha kutista Diospa contrampi sayaykorqanku. Ch'in pampapitaj payta phiñacherqanku.

⁴¹ Watejmanta Diosta pruebaman churallarqankutaj. Israelpa santonta llakicherqanku.

⁴² Mana uyarikorqankuchu jaqay p'unchaymanta, Dios atiyninwan enemigosninmanta salvasqanta,

⁴³ maypachachus jatuchaj señalesta t'ukunapaj jina ruwarqa Egiptopi, Zoannejpi.

⁴⁴ Chaypacha Egipto mayuta, yawarman tukucherqa. Egipciostaj chay mayusmanta mana ujyayta aterqankuchu.

⁴⁵ Chanta tukuy chay cheqaman ch'uspista, k'aylankulasta ima junt'aykucherqa, tukuy imatataj tukuchinankukama mikhorqanku.

⁴⁶ Poqochisqankuta khuruswan mikhucherqa, llank'asqankutataj langostaswan.

⁴⁷ Uvas chajrasninkuta granizowan chinkachin, higos sach'asninkutataj escarchawan.

⁴⁸ Wakasninkuta, ovejasninkuta ima granizowan, lliuj lliujkunawantaj wañuracherqa.

⁴⁹ Paykunaj patankuman Diosqa k'arajta phiñakuspa, apachimorqa phiñakuyta, sinch'i llakiyta, rabiakuyta ima tukuchej sajra angelesta jina.

⁵⁰ Phiñakuyninta kacharerqa. Kausayninkuta mana perdonarqachu, wañuymantaj paykunata jaywarqa.

⁵¹ Kikin Egiptopi kuraj wawasninkuta, jinallataj uywasninkutapis wañuracherqa, Campa miraynimpi kuraj kaj wawasninkuta.

⁵² Israel ayllunta uj tropa ovejasta jina orqhorqa, ch'in pampanejta pusarqa.

⁵³ Paykunata sumajta pusarqa mana manchachikunankupaj, enemigosninkutataj mar qocha p'ampaykorqa.

⁵⁴ Diosninchej ayllunta pusarqa santo llajtanman, mayqentachus pay jap'ikorqa chay orqoman.

⁵⁵ Diosta mana rejsej runasta, nacionesta ñaupaqenmanta qharqorqa, jallp'asnintaj Israelpa ayllusninman rak'irarqa; chaykunapitaj ch'ujllasninkupi paykunata kausacherqa.

⁵⁶ Paykunataj patapi kaj Diosta pruebaman churaspa phiñacherqanku, kamachisqasnintapis mana kasorqankuchu.

⁵⁷ Tatasninku kikillantaj Diosmanta karunchakunku, manataj payta qhaterqankuchu, wijch'uykakapunku uj mana allin arco jina.

⁵⁸ Manakaj altaresninkuwan phiñacherqanku, mana kaj dioskunata yupaychaspa tumpachikorqanku.

⁵⁹ Diosninchej phiñakorqa kayta rikuspa, Israeltataj manchayta chejnikorqa.

⁶⁰ Chayrayku Silopi kaj santo wasinta saqerparerqa. Chay wasintaj runas ukhupi karqa.

⁶¹ Atiyninta enemigosninwan jap'ichicherqa, jinallataj jatun kaynintapis.

⁶² Espadawan ayllunta wañuracherqa, chayaqempa contrampi phiñasqa kaspa.

⁶³ Waynasqa ninawan ruphasqas wañorqanku. Noviaspajpis mana casamiento takiy karqachu.

⁶⁴ Sacerdotesqa espadaswan wañuchisqas karqanku, viudastaj mana waqarikorqankuchu.

⁶⁵ Mosqoymanta jinataj Señorqa rijch'arerqa, sumajta maqanakoj runa vinowan machaykusqanmanta, yuyayninman kutirispa qhawarin jinata.

⁶⁶ Qhepamanta enemigosninta ayqecherqa, p'enqaypitaj wiñaypaj rikhuricherqa.

⁶⁷ Karuncharqa, Joséj ayllunta qhesacharqa, Manataj Efraín ayllumanta ajllarqachu.

⁶⁸ Ajllarqataj Judá aylluta, munakusqan Sión orqotawan.

⁶⁹ Diosta yupaychana wasita sayacherqa cielota jina, jallp'ata jinataj wiñaypaj sayachin.

⁷⁰ Kamachin Davidta ajllakorqa, paytaj oveja michej karqa.

⁷¹ Oveja michejmanta orqhorqa, ayllunta qhawanampaj, chayaqen Israel runasta.

⁷² Davidtaj Diospa ayllunta tukuy sonqo qhawarqa, cheqantataj ñaupajman pusarqa.