Salmos 76 - Qheshwa Biblia DC

Atipaj Dios

¹ Diosninchejqa Judapi rejsisqa, sutintaj Israelpi may mentasqa.

² Santo wasenqa Sión orqopi kashan, chaytaj Jerusalempi.

³ Jaqaypi maqanakuna armasta p'akerqa: Escudosta, espadasta, arcosta, flechasta ima.

⁴ Qan jatun kanki, Señorníy, orqosmantapis aswan jatun kanki.

⁵ Kallpayojkunapis atipasqas karqanku. Aswan wapu runaspis, mana imata ruwayta aterqankuchu. Wañuy puñuytataj puñukaporqanku.

⁶ Qan Señor, Jacobpa Diosnin, k'amejtiyki carretaspis, caballospis, kuyukuytapis mana atinkuchu.

⁷ Qanqa manchachikunamin kanki. Pitaj ñaupaqeykipi sayayta atinmanri? K'araj phiñasqa kashajtiykiri?

⁸ Janaj pachamantapacha justiciaykita rejsichinki, jallp'aqa manchachikun, kikimpitaj sayan.

⁹ Diosníy, khuskachanaykipaj sayaykojtiyki, tukuy kay pachapi llamp'u sonqoyojkunata salvanaykipaj.

¹⁰ Runaj phiñakuynenqa qanta yupaychanaman tukun, qantataj yupaychasunki chay phiñakuynenqa, uj chhikan phiñakuyninkupis pilluykiman tukun.

¹¹ Qankunataj, allinta ruwasaj, niychej Señor Diosniykichejman, junt'aychejtaj ruwasaj nisqaykichejta. Qankuna, muyuynimpi kajkuna, manchachikuna Diosman jaywana kajta jaywaychej.

¹² Payqa kurajkunaj kausayninta qhechun, manchachintaj kay pacha reykunataqa.