Salmos 75 - Qheshwa Biblia DC

Diosqa khuskachajmin

¹ Graciasta qoyku, Diosníy. Graciasta qoyku. Sutiykimanta qhaparikojkunaqa k'acha ruwasqasniykita willasqayku.

² Señorqa nin: Ajllasqaymantapacha cheqan justiciata ruwasaj.

³ Jallp'a kharkatejtin tukuy chaypi tiyakojkunawan, chaypachaqa noqa sinch'ita sayachini.

⁴ Qhasillamanta umankuta oqharejkunata, sajra runastapis nini: Ama umaykichejtaqa oqhariychejchu, nitaj wapu wapu kaychejchu.

⁵ Ama qhasillataqa atiyniykichejta rikuchiychejchu. Amataj wapu wapu parlaspaqa kaychejchu.

⁶ Allimpi qhawasqa kanaykichejqa, inti llojsimuymanta, nitaj inti yaykuymantachu jamun, nitaj ch'in pampamantachu.

⁷ Diosninchej cheqanta khuskachaj, ujkunataqa k'umuykachachin, ujkunatataj oqharin.

⁸ Señorqa makisnimpi jap'ishan, poqosqa vinoyoj copata, misturawan chajrusqata. Chay vinota jich'ajtintaj, tukuy kay pachapi sajra runasqa, ujyanqanku tukunankukama ni uj ch'aqayta puchuchispa.

⁹ Noqaqa Jacobpa Diosninta rejsichisajpuni, yupaychaspataj takisaj.

¹⁰ Sajra runaspa wapu wapu kayninkutaqa pampachasaj, k'acha runaj atiynintataj yapasaj.