Salmos 74 - Qheshwa Biblia DC

Llajtaj salvakuyninta Diosmanta mañakuna Asafpa yarawin.

¹ Diosníy, imaraykutaj wiñaypaj qhesachawaykuri? Imaraykutaj chhikatapuni phiñakunki, kanchaykimanta ovejasniykipajri?

² Yuyarikuy aylluykimanta, mayqentachus ñaupajmantapacha rantikorqanki, mayqentachus qan orqhorqanki chayaqeyki aylluykiman tukuchinaykipaj. Yuyarikuy Sión orqomanta maypichus tiyakorqanki chaymanta.

³ Jamuy, qhawanki wiñaypaj thuñisqa raqaykunata, Santo wasipi enemigoj tukuy mana allinta ruwasqanta.

⁴ Enemigosniykeqa santo wasiykipi atipasqankuta takinku. Waj banderastataj señalta churaykunku,

⁵ yaykuna punkupi. K'iski sach'as chaupipi, llant'a ch'ejtajman rijch'akunku.

⁶ Hachawan wajtaspa, martillowampis p'akerqanku k'ullumanta ruwasqas k'achanchanasta.

⁷ Santo wasiykimantaj ninawan jap'iykucherqanku. Kikin wasiykita qhesachanku, pampaman tukuchinankukama t'unarqanku.

⁸ Tukuchinawanchejkama pampachayta munawanchej, llajtantinmantataj ruphachinku, tantakunanchej wasista.

⁹ Manaña señalesta rikuykuchu, profetaspis manaña kankuchu. Manaña yachaykuchu mashkha unaytawanchus, kay jinallapuni kananta.

¹⁰ Diosníy, mayk'ajkamataj enemigos toreawasqaykuri? Mayk'ajkamataj sajrata qanmanta parlanqankuri?

¹¹ Imaraykutaj atiyniyoj makiykita pakaykunkiri? Imaraykutaj makisniykita simp'aykuspa qhepakunkiri?

¹² Unaymantapachaña qan reyniy kanki. Salvacionta kay pachapi wakichinki.

¹³ Qan atiyniykiwan mar qochata t'aqanki. Marpi jatuchachaj challwaspa umanta p'akinki.

¹⁴ Leviatampa umasninta ñat'orqanki, qaraykorqankitaj ch'in pampapi animalesman.

¹⁵ Qan yakusta p'utuchinki, juturispa, mayupi ima. Mana tukukoj yakusniyoj mayusta ch'akichinki.

¹⁶ Qampata p'unchaypis, tutapis. Qan churanki killata, intitapis.

¹⁷ Qan kay pachaman mojonesta churanki. Qan chiri tiempota churarqanki, q'oñi tiempotapis.

¹⁸ Yuyarikuy, Señor, enemigoqa qhasimanta ch'atasusqanta. Wampu runastaj qanmanta sajrata parlanku.

¹⁹ Ama ari chay jinatapuni llakisqa wawasniykita qonqawaykuchu. Juruk'utas jina kayku, mana kallpayoj. Ama k'ita animalkunaman qaraykuwaykuchu.

²⁰ Yuyarikuy tratoykimanta, imaraykuchus kay jallp'a junt'a kashan, maqanakuyta munaj runas.

²¹ Ama munaychu ñak'arichisqa runa k'umuykachananta. Yupaychanqanku wajchas, llamp'u sonqoyojkunapis sutiykita.

²² Sayarikuy Dios. Qampata kajmanta jark'akuy. Yuyarikuy imaynatachus wampu runa contraykita sapa p'unchay rimasqanta.

²³ Ama qonqaychu enemigosniykej qhaparisqankuta, contraykita qhaparisqankoqa wiñashallampuni.