Salmos 71 - Qheshwa Biblia DC

Uj machu runaj mañakuynin

¹ Señor qampi pakakuyta mask'ani. Amapuni p'enqachisqa kasajchu.

² Jark'away, libraway. Qan cheqan kasqaykirayku, uyarillaway, salvawaytaj.

³ Qan kanki pakakunay chhanka, chayman sapa kuti pakakoj rinaypaj. Qampuni kamacherqanki salvakunayta. Qan kanki pakakunay wasi, chhankataj.

⁴ Diosníy, sajra runaj makinmanta salvaway, runa wañuchej makinmanta, wapu wapu runamantapis salvaway.

⁵ Wayna kasqaymantapacha Señor, qan suyakunay, atienekunaytaj kanki.

⁶ Mamaypa wijsallampiraj kashajtiy, qampeqa atienekojña kani. Mamaypa wijsanmanta qanmin paqarichiwarqanki, chayrayku noqa wiñaypaj yupaychasqayki.

⁷ Ashkha runaj t'ukunan karqani, qan pakakunay kanki.

⁸ Diantinta simiypi junt'a, jatun kayniykimanta takiykuna.

⁹ Ama qhesachawaychu achachiña kajtiy. Ama saqerpariwaychu manaña kallpayoj kajtiy.

¹⁰ Enemigosniy wañuchiyta munawanku, paykuna pura parlanakunku, contraypitaj wakichikunku.

¹¹ Ninku: Qhatiykachaychej, jap'iychejtaj, imaraykuchus Dios payta saqerparin, manataj pipis payta salvajqa kanchu.

¹² Ama noqamanta karunchakuychu, Diosníy, usqhayta jamuy yanapariwaj.

¹³ P'enqaypi rikhurichunku, kausayniypa enemigosnin. P'enqaypipuni rikhurichunku, mana allin kayniyta munajkunaqa.

¹⁴ Noqarí, wiñaypaj suyallasqaykipuni, astawan astawan yupaychasqayki.

¹⁵ Diantinta parlaspa willasaj salvawasqaykumanta, cheqantataj ruwawasqaykumanta mana sut'inta yachashaspapis.

¹⁶ Willarasaj qan jatuchaj imasta ruwasqaykimanta, Señor. Willamusaj qanlla cheqan kasqaykita.

¹⁷ Diosníy, qan yachachiwarqanki wayna kasqaymantapacha. Kunankamapis willashallanipuni jatuchaj imasta ruwasqaykimanta.

¹⁸ Achachiña yuraj umaña kashajtiypis, amapuni Señor saqerpariwaychu; jatun atiyniykimanta kunan runa mitasman, qhepa runa mitasmampis willanaykama.

¹⁹ Cheqan kayniykeqa, Diosníy, cielokama chayan, jatun imasta ruwasqaykirayku. Qan jinaqa mana pipis kanchu.

²⁰ Ashkha llakiykunasta, mana allin kajtawan rikuchiwanki chaypis, watejmanta kausachillawankitaj. Jallp'a ukhumantataj aysarqowanki.

²¹ Sonqochawaspataj aswan jatunta ruwanki.

²² Noqataj qanta yupaychaspa takisaj cheqan kasqaykimanta, arpaj waqayninwan, salterioj waqaynimpiwan: Diosníy, Israelpa Santon.

²³ Takipususpa simiy kusikonqa, jinallataj salvasqayki almaypis.

²⁴ Diantinta simiypis willanqapuni, qan cheqan kasqaykita, p'enqaypi rikhurispa qhepakunku, noqapaj sajrata munajkunaqa.