Salmos 7 - Qheshwa Biblia DC

Cheqan runaj mañakuynin

¹ Señor Diosníy, qanllapi atienekuni, tukuy qhatiyakachawajkunamanta jark'away, libraywaytaj.

² Pajtataj león jina ithawankuman; manataj pipis salvayta atiwanmanchu.

³ Señor Diosníy, juchallikorqanichu? Runa masiywanchus sajra karqani?

⁴ Allinta ruwawaj kausaqeyta sajra kajwan kutichinichu?

⁵ Sajra runatatajchus pakarqani chayqa, enemigoy mask'awachun, pampatataj qhatatawachun, sutiytataj tukuynejpi ch'ichichachun.

⁶ Sayariy, Señor, phiñakuyniykipi; oqharikuy llakichiwajkunaj phiñakuyninkoj contrampi. Tukuy enemigosniypa ñaupaqempi oqharikuy. Qan justiciata churarqanki; chayrayku kutikuway.

⁷ Munakuyniykipi tukuy naciones tantakuchunku, qanrí patamanta kamachinki.

⁸ Señor, qan runasman cheqan kajta ruwanki. Señor cheqanta ruwaway sumaj kausayniyman jina, llimphu kasqayman jina.

⁹ Cheqan Dios, qan yachanki runaj sonqonta, yachallankitaj runaj yuyayninta. Chinkachiy sajra runaspa mana allin kayninkuta, astawanqa sinch'ita sayachiy cheqan sonqoyoj runata.

¹⁰ Diosqa pakakunay, salvantaj llimphu sonqoyojkunata.

¹¹ Diosqa cheqanta justiciata ruwajmin, sapa runaspajtaj sapa día phiñakun.

¹² Runachus Diosman mana kutirinman chayqa, Dios espadanta filoyachenqa. Arco flechampis apuntasqaña kashan.

¹³ Nina flechasninta kicharishanña, wañuchej armasnimpis wakichisqaña.

¹⁴ Sajra runata rikuychej; mana allin kajwan chichuyan, llullatataj wachanqa.

¹⁵ Uj jusk'uta ukhuta allarqa, chay kikin allasqan jusk'ullamantaj urmaykonqa.

¹⁶ Chay sajra ruwasqanwan, Diosta mana kasusqampiwan, umallanmantaj urmaykonqa.

¹⁷ Noqataj Diosta yupaychasaj, cheqan kasqanmanta, patapi Señorpa sutinmantaj takirikusaj.