Salmos 69 - Qheshwa Biblia DC

Llakiywan qhapariy

¹ Diosníy, salvaway. Yaku ukhupi jeq'eqashaniña.

² Chinkaykushani t'uru ukhuman. Mana mayman chakisniyta thurikuyta atinichu. Yaku ukhupi ancha ukhuman chayaykuni, yakutaj apashawan.

³ Chhikata qhaparisqaypi ch'akaña kani. Kunkay nanashawan, chhikata Diosniyta suyasqaymanta.

⁴ Ashkha kanku qhasillamanta chejnikuwajkunaqa, umaypi chujchasniymantapis astawan. Yanqhallamanta chejnikuwaj runasqa, aswan atiyniyojman tukunku. Mañawankutaj mana suwasqayta qopunayta.

⁵ Diosníy, qan yachanki wampu kasqayta. Mana qanmanta juchasniyta pakaykuyta atiymanchu.

⁶ Diosníy, Tukuy Atiyniyoj Dios. Qampi suyajkunaqa, ama noqaraykoqa p'enqaypi rikhurichunkuchu. Israelpa Diosnin, amapuni noqaraykoqa iskayrayachunkuchu, tukuy sonqo qanta mask'ajkunaqa.

⁷ Chejnikuwasqankutaqa qanrayku ch'inmanta aguantani. P'enqaywan mana yachanichu maymanchus uyayta churanayta.

⁸ Waj llajtayoj runa jina mana rejsisqa kani. Kikin wauqesniypaj mana rejsisqa kani.

⁹ Wasiykita sinch'i munakuy tukuchiwan. noqaman chayamuwanku tukuy laya toreajkuna, qanta qhesachajkunamanta.

¹⁰ Waqajtiy, ayunajtiypis asipayawanku.

¹¹ Llakiy p'achata churakuspapis tukuypaj asipayanan kani.

¹² Punkupi tiyajkunaj rimakunanku kani, machasqaspaj takipayanantaj.

¹³ Noqarí qanmanta, Señor, mañakorqayki. Diosníy uyariway kunanqa, mayta munakuwasqaykirayku kutichiway. Cheqamanta yanapawasqaykiraykutaj salvaway.

¹⁴ Ama t'urupi chinkayojta saqewaychu. Chejnikojkunamanta karunchaway, ukhu yakusmantapis salvaway.

¹⁵ Ama munaychu sinch'ita correj yaku apanawanta. Ama munaychu muyoj yaku apaykunawanta, chay ukhuman chinkaykuchispataj wisq'aykunawanta.

¹⁶ Señor kutichillaway. Qanqa may k'acha munakoj kanki. May k'acha sonqoyoj kasqaykirayku, qhawarillaway ari.

¹⁷ Ama kamachiykunamanta uyaykita pakakuychu ari; kay jina llakiypi ch'ayñashani usqhayallata uyariway.

¹⁸ Qayllaykamuy noqaman, salvawaytaj. Enemigosniymanta libraway.

¹⁹ Qan yachanki imaynatachus toreawasqankuta, p'enqaypi rikhurisqayta, uyayta ni mayman churayta atisqaytawan. Qan yachanki pikunachus enemigosniy kasqankuta.

²⁰ Qhesachawasqankumanta sonqoy llakisqa kashan. Mana kallpayoj, uj jinayasqa kashani. Qhasillata mask'arqani sonqochawajta, noqamanta khuyakojta, manataj tarerqanichu.

²¹ Mikhunayman jayaq'eta churaykunku, ch'akiwajtintaj vinagreta ujyachiwanku.

²² Kausaqesninkuwan, sumajta mikhunankoqa tojllaman tukuchun. Allin kajpaj mikhunankutaj misk'anankuman tukuchun.

²³ Ñawisninkuta chharpuyachiy ama rikunankupaj. K'uru wasa k'uru wasalla kharkatichunku.

²⁴ Phiñakuyniykita patankuman urmachiy, k'ajaj phiñakuyniykitaj paykunata jap'ichun.

²⁵ Tiyananku ch'inyachisqa kachun. Toldosninkupis ch'impacha kachun.

²⁶ Pitachus llakichisqaykita astawan qhatiykachanku. Pitachus nanachisqaykimantapis astawan alqochakunku.

²⁷ Qan kutichiy sajrata sajrallawantaj. Ama cheqanchayniykita taripachunkuchu.

²⁸ Kausay libromanta chinkachiy. Ama cheqan sonqo kajkunatawanqa qelqaykuychu.

²⁹ Noqaqa onqosqa, llakisqataj kani. Oqhariway, Diosníy, salvawaytaj.

³⁰ Diospa sutinta takispa yupaychasaj. Munakuywan tukuy sonqo yupaychasaj.

³¹ Chaywan Señorqa aswan sonqo junt'asqa kanqa, uj toro ñak'asqata, chayri astasniyojta, phapatusniyoj novillota altarpi ruphachinamanta nisqaqa.

³² Kayta rikuspa llakisqa kajkuna kusikonqanku. Diosta mask'ajkunaj sonqontaj kusiywan qhallallarenqa.

³³ Señorqa wajchakunata uyarin. Manataj qhesachanchu presochasqa runasninta.

³⁴ Señorta yupaychachunku, janaj pacha, kay pacha, yaku ima; tukuy chaykunapi kausajkunapis.

³⁵ Diosqa Sionta salvanqa. Watejmantataj Judá llajtata sayachenqa.

³⁶ Chaypitaj tiyakonqanku, jap'ikonqankutaj. Kamachisninkoj wawasnintaj chayaqenkupaj llajtata jap'enqanku. Señorpa sutinta munakojkunapis chaypi tiyakonqanku.