Salmos 68 - Qheshwa Biblia DC

Israelpa Diosnin

¹ Diosninchej sayarejtinkama, ruwayta qallarin chayqa, enemigosnenqa tukuynejman ch'eqeranqanku. Payta chejnikojkuna ñaupaqenmanta ayqechunku.

² Imaynatachus q'osñi chinkapun, maphapis ninapi unuyapun, ajinata Diospa ñaupaqempi sajrakunaqa pampachasqas kanqanku.

³ K'acha runasrí kusikunku. Diospa ñaupaqempi fiestata ruwanku, kusikuywantaj phinkiykachanku.

⁴ Qankuna Diosman takiychej, sutinman takiykunata takiychej. Phuyus patapi sayasqa kajta yupaychej. Señorpi kusikuychej. Kusikuychej paypa ñaupaqempi.

⁵ Diosninchej santo wasimpi tiyakun, payqa wajchaspa tatan. Viudastataj waqaychan.

⁶ Diosqa wajcha runasman, wasita qon tiyakunampaj. Presos kajkunata orqhospa qhapajyachin. K'ullukojkunari mana poqoj qhasi pampapi tiyakonqanku.

⁷ Diosníy, ch'in pampasta wasaykuspa, aylluykej ñaupaqenman llojsejtiyki,

⁸ jallp'aqa kharkaterqa, cielomantataj paramorqa. Sinaí orqo Diospa ñaupaqempi kharkaterqa, Israelpa Diosnimpa ñaupaqempi.

⁹ Diosníy qan sumaj sinch'ita parachimorqanki, ch'aki jallp'aykita sumaj jallp'aman tukuchinaykipaj.

¹⁰ Aylluykeqa chaypi wasichakorqa. Qanrí Diosníy, k'acha kasqaykirayku, tukuy imata wajchasman qorqanki.

¹¹ Señorqa uj palabrata qorqa, ashkha warmistaj mosoj willaykunata willajkuna karqanku.

¹² Soldadospa reyesninku ayqerqanku. Wasispi warmisqa partinakunku, enemigosninkumanta qhechusqankuta.

¹³ Qankunarí, pakasqa qhepakorqankichej, qolqewan lluch'asqa palomaj lijrasnin jina, qoriwan mayllasqa phurusnin jinataj.

¹⁴ Tukuy Atiyniyoj Dios reyesta ayqechishajtin, Salmón orqo pataman rit'iykamorqa.

¹⁵ Basán orqoqa Diospa orqonmin. Puntasnenqa ancha altos.

¹⁶ Qankuna, alto orqos, imaraykutaj q'omerispa qhawankichej Diospa tiyakunan orqotarí? Cheqamanta Señorqa chaypi wiñaypaj kausakonqa.

¹⁷ Diospa maqanakuna carrtasnenqa, waranqasmanta waranqa, chay carrestaspi Señorqa Sinaí orqonmanta, yupaychana wasinman jamorqa.

¹⁸ Diosníy, puntanman wicharerqanki presochasqasta apaspa. Runas jaywasorqanku chaytataj jap'ikorqanki. Contraykipi sayaykojkunapis ñaupaqeykipi k'umuykukunku.

¹⁹ Señorqa bendicisqa kachun; sapa día allin imasta qowanchej, chay salvaj Diosninchejqa.

²⁰ Diosninchejqa salvaj Dios, Señormin wañuymanta librajqa.

²¹ Cheqamanta Diosninchejqa enemigosninchejpa umanta p'akenqa, juchallikullankupuni chaykunaj umanta.

²² Señorninchej nin: Basanman kutichimusqayki, Ukhu mar qochamanta kutichimusqayki.

²³ Chakisniykita enemigosniykej yawarnimpi mayllakunaykipaj, alqosniykipis chayta laqhonankupaj.

²⁴ Diosníy, Diostaj, reytaj kanki. Santo wasiykiman yaykojta rikusorqanku, qanta yupaychaspa chayta ruwanku.

²⁵ Takejkunaqa ñaupajta rinku, tocajkunarí qhepata rinku, chaupita sipaskuna rinku, tamboresta tocaspa rinku.

²⁶ Tukuyniykichej, Señor Diosta yupaychaychej, tukuy Israelmanta tantakojkuna yupaychaychej.

²⁷ Paykunaj ñaupaqenkuta sullk'a kaj Benjamín rin, Judapi ashkha kamachejkunawan khuska, Zabulonmanta, Neftalimanta kurajkunawan ima.

²⁸ Diosníy, atiyniykita rikuchiy. Noqaykuwan ruwasqaykita, watejmanta sinch'ita sayachispa sut'iman churay.

²⁹ Jerusalempi kaj santo wasiykimantapacha, tukuy reyes t'inkata apamusunku.

³⁰ Armasqa tantakoj runasta k'amiy, jinallataj llajtaspa novillosninwan tantasqa torosta ima. Tukuyninku qolqesninkuwan k'umuykunankukama. Maqanakuyllatapuni munaj runasta ch'eqerachiy.

³¹ Egiptomanta kurajkuna kachasqa jamonqanku, Etiopía runas usqhayllata makisninkuta Diosman oqharenqanku.

³² Diosman takiychej, kay pacha reykuna Señorman takiychej,

³³ mayqenchus wiñay janaj pachapi sayasqa, cielo junt'a kashan chayman. Uyariychej imaynatachus, chay sinch'i atiyniyoj parlaynin uyarikojta.

³⁴ Rejsiychej Diospa atiyninta. Paypa jatun kaynin Israelman chayan. Atiynintaj janaj pachapi kashan.

³⁵ Llimphu wasinmantapacha manchachikuna Diosqa, Israelpa Diosnin, kallpachan, atiytataj ayllunman qon. Diosninchejqa yupaychasqa kachun.