Salmos 66 - Qheshwa Biblia DC

Ruwasqasninmanta Diosta yupaychana

¹ Diosman kusisqas takiychej, tukuy kay pachapi tiyakojkuna.

² Paypa jatun sutinman takiychej. Yupaychaspa k'achata takiychej.

³ Diosman takiychej: Ruwasqasniykeqa may sumajpuni. Jatun atiyniykirayku, enemigosniykeqa ñaupaqeykipi mancharisqas urmanku.

⁴ Tukuy kay pachapi qanta yupaychasonqanku, sutiykimantaj takenqanku.

⁵ Jamuychej, Diospa ruwasqasninta qhawanaykichejpaj, runasrayku chay jina sumaj ruwasqasninta.

⁶ Mar qochata ch'aki jallp'aman tukucherqa. Ñaupa tatasninchej mayuta chakipi chimparqanku. Chayrayku Diospi kusikunachej!

⁷ Atiyninwan Diosqa wiñaypaj kamachin. Ñawisnenqa llajtasta qhawaykun, Diosta mana kasojkuna ama contrampi oqharikunankupaj.

⁸ Jatun ayllus Diosninchejta yupaychaychej. Uyarichiychej yupaychana takiykunata,

⁹ kausachiwasqanchejrayku, manataj urmajta saqewasqanchejrayku.

¹⁰ Diosniyku pruebaman churawarqayku. Qolqeta jina llimphuchawarqayku.

¹¹ Ch'ipapitaj urmachiwayku, uj jatun llakiytataj q'epirichiwayku.

¹² Saqenkitaj ima rijch'aj runapis saruykachanawaykuta. Yaku patata, nina patata ima puriyku, chaymantaraj samarichiwayku.

¹³ Wasiykiman yaykuspa, uywa ñak'asqasta ñaupaqeykipi q'olachisaj. Ajinata nisqasuyta ruwasaj, junt'asajtaj.

¹⁴ Jatun llakiypi kashaspa junt'asaj, parlarqani chayta.

¹⁵ Altarniykipi wira uywasta ñak'aspa q'olachisaj. Jaywasqayki torosta, chivosta, corderosta misk'i q'apaynintawan.

¹⁶ Tukuy qankuna Diosta manchachikojkuna jamuychej. Uyariychej willasqaykichej, noqarayku pay ruwasqanta.

¹⁷ Simiywan, qalluywan ima, wajyakorqani, yupaycharqanitaj.

¹⁸ Sajrata yuyayman karqa chayqa, Señor manachá uyariwanmanchu karqa.

¹⁹ Paytaj uyariwan tukuy mañakusqasniyta qonawampaj.

²⁰ Diosqa yupaychasqa kachun. Mañakusqayta ama qhesachawanchu, nitaj munakuynintapis.