Salmos 64 - Qheshwa Biblia DC

Diospa yanapayninta mañakunamanta

¹ Diosníy, willakusqasuyta uyariway. Manchachej enemigosmanta kausayniyta jark'ay.

² Pakaykuway sajrakunamanta, pakayllapi wakichikusqasninkumanta. Libraway contraypi oqharikojkunamanta.

³ Espadata jina qallunkuta filoyachinku. Parlayninkoqa venenoyoj flechas jina.

⁴ Pakayllamanta flechankuta mana juchayojkunaman kachaykunku. Ujllata kacharinku nitaj mancharikunkuchu.

⁵ Paykuna pura sajrata ruwanankupaj yanapanakunku. Trampasta churanankupaj wakichikunku. Yuyankutaj mana pipis rikunanta.

⁶ Yuyanku mana pipis mask'ananta. Runaj sonqonta rejsejqa, aswan ukhu yuyayninchejtapis rikojqa, sumajta mask'anqa, maychus kajta yachanampaj.

⁷ Dios paykunata flechasninwan nanaykuchenqa. Kaymanta jinalla nanaykuchisqas rikhurenqanku.

⁸ Kikin parlasqallankupitaj urmanqanku. Paykunata rikojkunataj kusipayanqanku.

⁹ Chaypacha tukuy runas Diosta jatunchanqanku; ruwasqasninmanta parlanqanku, yachanqankutaj Diospa ruwasqasninta.

¹⁰ Cheqan runaqa Diospi kusikonqa, paypitaj atienekonqa. Tukuy cheqan yuyayniyoj kajkunarí, kusisqas kakonqanku.