Salmos 63 - Qheshwa Biblia DC

Diosqa runaj kusiynin

¹ Diosníy, qan Diosniy kanki. Tukuy sonqo mask'ayki. Qanmanta ch'akisqa kani. Tukuy kayniywan munakuyki, mana yakuyoj qhasi ch'aki jallp'a jina.

² Yupaychana wasiykipi rikusuyta munani, qhawaytataj munani atiyniykita k'anchayniykitawan.

³ Munakuyniykeqa kausaymanta aswan sumaj. Simiywan yupaychasqayki.

⁴ Tukuy kausayniypi qanmanta allinta parlasaj. Makisniyta oqharispa qanmanta mañakusaj.

⁵ May kusisqa, sajsasqataj qhepakusaj, jatun mikhuypi sajsakoj runa jina. Kusisqataj simeyqa yupaychasonqa.

⁶ Ch'isisnin puñuykuspaña, qanmanta yuyarikuni, qampitaj yuyani.

⁷ Qan kanki ari yanapawajqa. Lijrasniyki urapi kusisqa kakuni.

⁸ Tukuy kausayniy qanwan khuska kashan. Paña makiykeqa mana kachariwanchu.

⁹ Wañuchiyta munawajkuna, sepulturaman chinkaykonqanku.

¹⁰ Espadawan wañuchisqas kanqanku, atojkunataj oqoykonqanku.

¹¹ Reyqa Diospi kusikonqa. Paypa sutimpi jurajkunaqa, takispa yupaychanqanku. Llullakojkunaj siminkoqa wisq'asqa kanqa.