Salmos 62 - Qheshwa Biblia DC

Dioslla jark'akojqa

¹ Diosllapi sonqo tiyasqa kayta tarini. Salvacionneyqa paymanta jamun.

² Payllapuni salvakunay, pakakunay chhankataj. Mana urmasajchu, imaraykuchus paypi pakakuni.

³ Jayk'ajkamataj qankuna maqanakuwaj jamunkichejri, saruytataj munawankichejri, urmaj perqapis kayman jinari, chayri pampaman urmasqa kanchapis kayman jinari?

⁴ Urmachiwayllapi yuyankichej, llullakuyllata munakunkichej. Siminkuwan allinta parlapayawanku, sonqonkupitaj maldiciwanku.

⁵ Diosllapi sonqo tiyasqa kayta tarini. Suyayneyqa paymanta jamuwan.

⁶ Payllapuni pakakunay chhanka, salvawajniytaj. Mana urmasajchu, imaraykuchus paymin jark'akuwajneyqa.

⁷ Diosllamanta salvakunay, sumaj kanaypis jamun. Payllapuni jark'akuwajniy, pakawajniypis.

⁸ Ayllúy, paypipuni suyakuy. Parlaychej tukuy sonqo mañakuspa. Diosmin jark'awajninchejqa.

⁹ Runaqa qhasi mana kajlla, wajcha runapis, qhapaj runapis. Pesaspi iskayninkuta pesasunman chayqa, mana kajmantapis aswan qhasilla.

¹⁰ Ama maqanakupeqa atienekuychejchu. Amataj suwakuypipis jatunchakuychejchu. Qhapaj kaspapis ama qolqellaykichejpi sonqoykichejta churaychejchu.

¹¹ Diospa parlasqanta, iskay kutita uyarini, Diospata atiytaj munakuytaj kasqanta.

¹² Señorníy, qampata ari khuyakoyqa, imaraykuchus tukuy ima ruwasqankuman jina, t'inkata qopunki.