Salmos 61 - Qheshwa Biblia DC

Diospa waqaychaynimpi atienekunamanta

¹ Diosníy, uyariway nanaywan qhaparikususqayta. Uyariway mañakusqasuyta.

² Kay pachapi uj k'uchumantapacha, qanta qhaparikamuyki, sonqoy wañuyta munajtin. Noqamanta aswan alto orqo puntaman pusaway.

³ Qan pakakunay kanki. Enemigoymanta librakunaypaj, sinch'i torre jina kanki.

⁴ Wasiykipi wiñaypaj tiyakuyta munani, lijrasniyki urapi pakasqa.

⁵ Qan, Diosníy, ruwasaj nisqasuyta uyariwanki, chayaqetataj qan qowanki, sutiykita yupaychajkunaj chayaqenta.

⁶ Reyman unay kausayta qoy. Unay unay watasta kausachun.

⁷ Reyqa Diospa ñaupaqempi wiñaypaj kakuchun. Munakuywan cheqan kaywan payta waqaychachun.

⁸ Jinata sutiykitaqa wiñaypaj yupaychasaj, sapa diataj ruwasaj nisqayta junt'asaj.